काठमाडौँ : तामाङ न्हाङखोरको प्रथम वार्षिकीको अवसरमा नेपाल प्रज्ञा-प्रतिष्ठानसँगको सहकार्यमा आयोजित दुईदिने तामाङ अध्ययन गोष्ठी काठमाडौंमा सम्पन्न भएको छ
नेपाल प्रज्ञा-प्रतिष्ठानको हल, कमलादीमा फागुन २७ र २८ गते सम्पन्न गोष्ठीमा २ वटा विमर्श कार्यक्रम र २१ वटा सेमिनार पेपर प्रस्तुत भएको थियो । विमर्शमा तामाङ लोकगीत "फापरे व्हाइ" र "तामाङ वंशावली" बारेमा विषय केन्द्रित बहस भएको थियो ।
पेपर मूलतः भाषा, साहित्य, शिक्षा, सञ्चार, खानपिन, प्रविधि, इतिहास, अर्थव्यवस्था, संस्मरण, महिला, विकास आदि विषयहरूमा गोष्ठी केन्द्रित रहेको आयोजकले बताएका छन् ।
नेपालका साथै भारतका कोलकता, दार्जिलिङ र सिक्किमबाट पनि पेपर प्रस्तुत भएको थियो । यस अवसरमा तामाङ भाषा र साहित्यको प्रवर्द्धनमा १०० भन्दा धेरै अंक प्रकाशन र साहित्यिक कार्यक्रम सञ्चालन गरेकोमा १० हजारसहित पुरस्कृत गरियो ।
तामाङ न्हाङखोरका संरक्षक डा. गणेश योन्जनको अध्यक्ष्यतामा सम्पन्न उद्घाटन समारोहमा नेपाल प्रज्ञा-प्रतिष्ठानका कुलपति गंगाप्रसाद उप्रेती प्रमुख अतिथि थिए ।
प्राज्ञ वैरागी काइँलाले आफ्नो किनोट सम्भाषण प्रस्तुत गरेका थिए । तामाङ न्हाङखोरका अध्यक्ष अमृत योन्जन-तामाङको सभाध्यक्षमा समापन समारोह सम्पन्न भएको थियो ।
प्रतिक्रिया दिनुहोस !
