मुख्यमन्त्री कप अन्तरप्रदेश खेलकुद : सुदूरपश्चिम र प्रदेश २ सेमिफाइनलमा
फागुन ३०, २०७५ बिहीबार २१:२२:०
धनगढी : मुख्यमन्त्री कप अन्तरप्रदेश खेलकुद प्रतियोगितामा बिहीबार भएको पुरुष क्रिकेटमा सुदूरपश्चिम र प्रदेश २ सेमिफाइनल पुगेका छन्।
कर्णाली र प्रदेश ५ भने प्रतियोगिताबाट बाहिरिएका छन्। दुवै टोलीले लगातार दुई खेलमा हार बेहोर्दै प्रतियोगिताबाट बाहिरिएका हुन्। प्रदेश ४ सँग ५६ रनले पराजित हुँदै प्रदेश ५ प्रतियोगिताबाट बाहिरियो।
टस जितेर पहिले ब्याटिङ गरेको गण्डकीले निर्धारित २० ओभरमा आठ विकेट गुमाएर ८६ रन बनायो। ८७ रनको लक्ष्य पछ्याएको प्रदेश ५ ले १३.२ ओभरमा सबै विकेट गुमाउँदै ३० रन मात्रै बनाउन सक्यो।
अर्को खेलमा कर्णाली प्रदेश २ सँग आठ विकेटले पराजित हुँदै प्रतियोगिताबाट बाहिरियो। पहिले ब्याटिङ गरेको कर्णालीले १९.४ ओभरमा अल आउट हुँदै ६८ रन मात्रै बनाउन सक्यो।
प्रदेश २ ले १४.१ ओभरमा दुई विकेट गुमाएर लक्ष्य भेट्टायो।
यसैगरी महिला क्रिकेटमा प्रदेश ३ र ५ विजयी भएका छन्। प्रदेश ३ ले गण्डकी प्रदेशलाई सात विकेटले पराजित ग¥यो। गण्डकीले २० ओभरमा चार विकेट गुमाएर एक सय ११ रन बनायो। सो लक्ष्य प्रदेश ३ ले १३.३ ओभरमा तीन विकेट गुमाएर भेट्टायो।
अर्को खेलमा प्रदेश ५ ले प्रदेश २ लाई १५ रनले हरायो। प्रदेश ५ ले आठ विकेटको क्षतिमा एक सय १५ रन बनायो। प्रदेश २ ले १९.५ ओभरमा अलआउट हुँदै एक सय रन मात्रै बनाउन सक्यो।
धनगढी रंगशालामा भएको पुरुष फुटबलमा प्रदेश १ र प्रदेश २ सेमिफाइनलमा पुगेका छन्। दुवै प्रदेश लगातार दोस्रो जित निकाल्दै सेमिफाइनल पुगेका हुन्। प्रदेश १ ले गण्डकी प्रदेशलाई १–० ले हरायो। अर्को खेलमा प्रदेश २ ले प्रदेश ५ लाई १–० गोलले नै पाखा लगायो। दुवै खेलमा हार बेहोर्दै गण्डकी र प्रदेश ५ प्रतियोगिताबाट बाहिरिएका छन्।
प्रतिक्रिया दिनुहोस !
