राजविराज : सप्तरीको सुरुङ्गा नगरपालिका–९ प्रमाणपुरमा हावाहुरीसँगै भएको आगलागीमा १० वटा घर जलेर नष्ट भएका छन् ।
शनिबार दिउँसो स्थानीय बद्री मण्डलको घरमा सल्किएको आगो फैलिएर आठ परिवारको १० वटा घर नष्ट भएका हुन् । आगलागीबाट करिब ३६ लाख मूल्य बराबरको क्षति भएको इलाका प्रहरी कार्यालय कडरबोनाले प्रारम्भिक अनुमान गरेको छ ।
हावाहुरीपछि फैलिएको आगलागीले बद्री मण्डलका साथै भोला मण्डल, भदै मण्डल, मनोज मण्डल, विद्या मण्डल, दशरथ मण्डल, शिवा मण्डल र अधिकलाल मण्डलको घर जलेर लाखौं मूल्य बराबरको धनमाल नष्ट भएको छ ।
आगलागीबाट घरमा रहेको नगद, खाद्यान्न, फर्निचर, कपडा, भाँडाकुँडा लगायत सामान जलेर नष्ट हुँदा सो परिमाणको क्षति भएको प्रहरी निरीक्षक सुरेन्द्रकुमार श्रेष्ठले जानकारी दिए ।
गर्मी र हावाहुरीका कारण आगो सल्किना साथ तिब्र गतीमा फैलिएको र समयमा नियन्त्रण हुन नसक्दा आठ परिवार घरबारविहिन बनेका हुन् । सप्तरीको शम्भुनाथ नगरपालिका र सिरहाको लहान नगरपालिकाबाट पुगेको वारुणयन्त्रको सहयोगमा प्रहरी र स्थानीयबासीले आगो नियन्त्रणमा लिएका छन् ।
गर्मी मौसम सुरु भएदेखि चल्न थालेको हावाहुरीले सप्तरीमा एक सातामा करिब आधा दर्जन आगलागीका घटनामा ७५ लाख रुपैयाँ बराबरको क्षति भएको राजविराज नगरपालिका वारुणयन्त्र शाखाले जनाएको छ।
प्रतिक्रिया दिनुहोस !
