भारतको चुनाव : प्रधानमन्त्री मोदीकै क्षेत्रमा चुनाव बहिष्कार, बिजेपी नेतालाई प्रतिबन्ध
चैत ४, २०७५ सोमबार १७:३८:०
नयाँदिल्ली : भारतीय प्रधानमन्त्री नरेन्द्र मोदीकै चुनावी क्षेत्र गुजरातको एक मुख्य सहर सुरतको केही भागमा दशौं हजार मानिसले लोकसभा चुनाव बहिष्कार गरेका छन् ।
बहिष्कारसँगै १० हजार भन्दा बढी परिवारले भारतीय जनता पार्टीका एक प्रभावशाली नेता तथा सांसद सिआर पाटिललाई यस क्षेत्रमा प्रवेश गर्नै रोक लगाएका छन् । यस क्षेत्रमा सयौंको संख्यामा ब्यानर टाँगेरै उनीहरुले चुनाव बहिष्कारको घोषणा गरेका हुन् । ‘मोदी से बाहिर नही, सिआर तेरी खाइर नही’ लगायत नारा लेखिएका ब्यानर ठाउँ ठाउँमा टाँगिएको छ ।
खासगरी उत्तर भारत क्षेत्रबाट २५ वर्षअघि यहाँ बसोबास गर्दैआएका स्थायी बासिन्दाहरुको बाहुल्य रहेको समुदायबाट चुनावको बहिष्कार भएको हो । सचिन, गाभेनी, भरोदा, पन्देसारा, पर्वत पटिया, कटोद्रा लगायत क्षेत्रमा यसरी बिरोध भएको हो ।
खासगरी प्रधानमन्त्री मोदी भन्दा पनि यहाँका सांसद सिआर पटिलसँग उनीहरु रुष्ट भएको यहाँ टाँगिएका ब्यानरमा देखिन्छ । उनीहरुले स्थानीय बजारमा थुप्रै ब्यानर टाँगेर बिरोध जनाएका हुन् । सुरतमा १५ लाख भन्दा बढी उत्तर भारत क्षेत्रका बासिन्दा बस्दैआएको तथ्यांक छ । तीमध्ये धेरैजसो कारखानामा मजदुर तथा अन्य काममा संलग्न छन् ।
‘१० वर्षभन्दा अघिदेखि हामीले एकजना पनि जनप्रतिनिधिलाई भेट्न पाएका छैनौँ, तर उत्तर भारत क्षेत्रबाट आइ बसोबास गर्ने समुदायलाई यहाँका सरकारी कार्यालयबाट सेवा लिन अप्ठ्यारो पर्दैआएको छ । तर कोही पनि निर्वाचित जनप्रतिनिधिले अहिलेसम्म यस्तो समस्या सल्टाउन प्रयास समेत गरेको छैन ।’ उत्तर भारत समुदायका नेता अजय सिंहले द वायरलाई बताएका छन् ।
आफूहरुले यहाँ भोग्नुपरेको समस्याबारे छलफल गर्न सांसद सिआर पाटिलसँग बारम्बार भेट्न प्रयास गरे पनि सम्भव नभएको उनको भनाइ थियो । पछिल्लो २५ वर्षयता कर तिर्दैआएको उत्तर भारत क्षेत्रको समुदाय नै चुनावको माहोलमा आन्दोलित बनेको हो । जब कि, उक्त समुदाय गुजरतामा कुनै पार्टीलाई जिताउने वा हराउने निर्धारक शक्तिको रुपमा चिनिएको छ ।
सांसद सिआर पाटिलले भने केही मानिसहरु मात्रै आफूविरुद्ध लागेको प्रतिक्रिया दिएका छन् । तर उनीहरुको आन्दोलनले आफूलाई असर नगर्ने उनको जिकिर छ । उनले भनेका छन्, ‘मैले स्थानीय स्तरमा पुगेर काम गरेको छु । तिनिहरु त प्रतिपक्षी दलका मानिस हुन् । म आफ्नो चुनावी अभियानलाई जारी नै राख्ने छु ।’
प्रतिक्रिया दिनुहोस !
