काठमाडौं : विवेकशील नेपाली दलले राष्ट्रिय प्रहरी प्रतिष्ठानलाई राष्ट्रपतिको निवासमा गाभ्ने सम्बन्धी अध्ययन प्रतिवेदन सरकारले लुकाएको आरोप लगाएको छ। मंगलबार वक्तव्य जारी गर्दै दलले उक्त आरोप लगाएको हो।
'प्रधानमन्त्री तथा मन्त्रीपरिषदको कार्यालयले राष्ट्रिय प्रहरी प्रतिष्ठानको भू-भागलाई राष्ट्रपतिको निवासमा गाभ्ने निर्णय गर्न आधार बनाएको राष्ट्रपति तथा उपराष्ट्रिपतिको कार्यालय तथा आवास सम्बन्धि अध्ययन प्रतिवेदन २०७५ लाई सूचनाको अधिकार सम्बन्धी ऐनको प्रावधान बमोजिम उपलब्ध गराउन अस्वीकार गरेको छ' दलद्वारा जारी वक्तव्यमा भनिएको छ।
उक्त प्रतिवेदन सार्वजनिक गर्न दलका संयोजक उज्वल बहादुर थापा लगायत विजय बाबु शिवाकोटी, तथा शशी विक्रम कार्कीले राष्ट्रिय सूचना आयोगमा पुनरावेदन दर्ता गरेका छन्। करीव ७० वर्ष पुरानो इतिहास बोकेको राष्ट्रिय प्रहरी प्रतिष्ठानको भू-भागलाई राष्ट्रपति कार्यालयमा गाभ्ने सरकारको निर्णय विवादित बनेपछि विवेकशील दलले गत पुस १२ गते पहिलो पटक यो सूचना माग गरेको समेत वक्तव्यमा उल्लेख छ।
प्रतिक्रिया दिनुहोस !
