राजविराज : सरकारसँग ११ बुंदे सहमतिपछि ‘जनमत पार्टी’ गठन गरेका सिके राउत मंगलबार आफ्नो गृहजिल्ला सप्तरी आएका छन् ।
उनको स्वागतमा पुगेका समर्थकहरुले ‘जनमत दो, आजादी लो’, ‘सिके राउत जिन्दावाद’ लगायतका पृथकतावादी नारा पनि लगाइएको थियो । मंगलबार उनी सप्तरीको कल्याणपुर, शम्भुनाथ, रुपनी, राजविराज, महादेवा, तोपा, हनुमाननगर हुँदै भारदह पुगेका थिए । भ्रमणको क्रममा राउतले साँझ ६ बजे कंकालिनी भगवतीको पूजापाठ समेत गरेका छन् ।
जनमत पार्टीको व्यानरसहित नारावाजी गर्दै आइपुगेको जुलुसले ‘सिके राउत जिन्दावाद, जनमत पार्टी जिन्दावाद’ भन्दै चर्को नारावाजी समेत गरेका थिए ।
राउतको समर्थनमा मोटरसाइकल, जिप, कार, ट्रयाक्टरसहितको जुलुसले पृथकतावादी नारा लगाएको हो । आफ्नो घर महदेवा गाउँपालिकास्थित अंकुरी महादेव र भारदहस्थित कंकालिनी मन्दिरको पूजापाठ गरेका राउतले कतै सम्बोधन भने गरेनन् ।
सञ्चारकर्मीहरुसँग पनि अभिव्यक्ति दिएका थिएनन् । सरकारसँग भएको सहमतिसँगै जनमत पार्टी गठनलाई ऐतिहासिक मान्दै कार्यकर्ताहरुले राउतको गृहजिल्ला आगमनलाई विजयी ¥यालीको रुपमा मनाएको केन्द्रीय सदस्य सुरेन्द्र मधेसीले बताए ।
जनमत पार्टीको गठनसँगै संवैधानिक रुपमा जनताको समस्या, माग, हकहित र अधिकारका लागि निस्वार्थ भावले अनवरत संघर्षरत रहने तथा सबैखाले विभेद अन्त्य गर्न पहलकदमी लिने प्रतिवद्धतासहित जनमत जुटाउन जनतासमक्ष पुग्ने पार्टीको नीति रहेको सहभागी नेताहरुले बताए । कार्यकर्ताहरुसँग अबेर रातिसम्म छलफलमा रहने राउत सुत्नका लागि आफ्नो घर महदेवा गाउँपालिका पुग्नेछन् ।
प्रतिक्रिया दिनुहोस !
