सिन्धुली : नेपाली कांग्रेसका वरिष्ठ नेता रामचन्द्र पौडेलले दुई तिहाई नेतृत्वको नेकपाको सरकार सर्वसत्तावादतिर लागेको आरोप लगाएका छन् । नेपाल प्रेस युनियन सिन्धुलीले आयोजना गरेको पत्रकार भेटघाट कार्यक्रममा बोल्दै नेता पौडेलले अख्तियार, सर्वोच्च अदालत, सेना परिचालनको अधिकार आफैँमा केन्द्रित गर्दै ओली नेतृत्वको सरकार अधिनायकवादतर्फ अघि बढेको आरोप लगाएका हुन् ।
नेपाली सेना प्रधानमन्त्री मातहतमा राखेर सञ्चालन गर्न सरकार अघि बढेको प्रति आपत्ति जनाउँदै नेता पौडेलले यस्तो कार्य नेपाली कांग्रेसलाई कुनै हालतमा मान्य नहुने जिकिर गरे । उनले अर्को एक प्रसंगमा नेत्रविक्रम चन्द नेतृत्वको माओवादीमाथी लगाइएको प्रतिबन्ध र सिके राउतबीचका ११ बुँदे सहमतिले देशमा गम्भीर संकट निम्त्याउने खतरा औँल्याए । उनले भने, ‘विप्लव समूहलाई कसरी मूलधारमा ल्याउनुपर्छ भन्ने प्रचण्ड र केपी ओलीलाई राम्रोसँग थाहा छ । तर, विप्लव पार्टी नै प्रतिबन्ध लगाउनु लोकतन्त्र माथिको प्रहार हो ।’ राउतसँग ११ बुँदे सम्झौता गर्ने सरकारले विप्लवसँग भने वार्ता गर्न नसक्नु आश्चर्य व्यक्त गरे ।
अधिकांश समय ओली नेतृत्वको सरकारको आलोचना गरेका नेता पौडेलले काण्डैकाण्ड, भ्रष्टचार नै भ्रष्टचार भएकाले नेपाली राजनीतिक इतिहासमै यो सरकार असफल सावित भएको दावी गरे । उनले, सुन काण्ड, वाइडबडी काण्डमा सरकारकै संलग्नता रहेको दावी गर्दै प्रधानमन्त्री ओलीले यस्ता काण्डका बारेमा स्वयतपत्र जारी गर्नुपर्ने माग समेत राखे ।
राजासँग भन्दा कस्युनिष्टसँग लड्न कठिन भएकाले चनाखो रहन नेता कार्यकर्तालाइ पौडेलको निर्देशन दिए । कम्युनिष्टहरुले शब्द फेरेर जनतालाइ झुक्याउने गरेको उनले बताए । कहिले जनवाद, कहिले बहुदलिय जनवाद, अनि समाजवाद, फेरी वैज्ञानिक समाजवाद कति झुक्याउन सकेको, यस्तो कहिं हुन्छ ? पौडेलले प्रश्न गरे ।
पौडेलले पार्टी नेतृत्व गुठको अन्त्य गर्दै नयाँ ढंगबाट अगाडि बढ्नुपर्ने जोड दिए । उनले पार्टीको अबको नेतृत्व सभापति देउवाबाट नचल्ने संकेत गर्दै समय र परिस्थितिअनुसार जनताले चाहे आफुले लिने पनि खुलासा गरे ।
पार्टी सभापति देउवातर्फ लक्षित गर्दै पौडेलले भने, ‘सोच्न, बोल्न र गर्न नसक्ने नेतृत्व रहुन्जेल पार्टी उभो लाग्दैन। अब नेताले हैन कार्यकर्ताले नेतृत्वको मुल्यांकन गर्ने बेला आएको छ ।’ पौडेलले लोकतन्त्रलाई खत्तम पार्न, जात, धर्म, संस्कृति, भुगोल र क्षेत्रका नाममा हुने सबै गतिविधि लोकतन्त्र र प्रजातन्त्रमाथीको आक्रमण भएको तर्क गरे । मधेसीको जनताको मानसपटलमा भ्रम छर्ने काम भएकाले भोलीबाटै प्रदेश नं २ बाट आफुले मधेस संवादको थालनी गर्ने योजना बनाएको छु,’ उनले भने ।
कांग्रेसका केन्द्रीय सदस्य चन्द्र भण्डारीले नेकपा सरकारमा बाँदर प्रवृत्ति बढ्दै गएको टिप्पणी गरे । तत्कालिन माओवादी र एमालेलाई संकेत गर्दै रामायणको प्रसंग झिकेर उनले भने', राम, रावण र हनुमानको युद्ध जस्तो बन्दुक बोकेर जंगल छिरेका बाँदरहरु रावणलाइ हराइ सँगै सिंहदरबारप्रवेश गरेकाले अहिलेको अवस्था त्यस्तै बनेको छ ।’
प्रतिक्रिया दिनुहोस !
