खेलमै जीवन सुम्पिने खेलाडीलाई स्थायी जीविकोपार्जन : मुख्यमन्त्री राउत
चैत ११, २०७५ सोमबार १५:४३:०
जनकपुरधाम : प्रदेश नम्बर २ का मुख्यमन्त्री लालबाबु राउतले खेलमै आफ्नो जीवन समर्पण गर्ने क्षमतावान खेलाडीहरुको स्थायी जीविकोपार्जनको व्यवस्था गर्ने नीति प्रदेश सरकारले लिएको बताएका छन् ।
जनकपुरमा सुरु तेस्रो सहिद कप क्रिकेट प्रतियोगिताको उद्घाटन गर्दै उनले विश्वमै मुलुक र प्रदेशलाई चिनाउने खेलाडीहरुको मनोबल उच्च राख्न प्रदेश सरकारले कुनै कसर बाँकी नराख्ने प्रतिबद्धता जनाए ।
अन्य मुलुकमा खेलाडीलाई विभिन्न निकायमा जागिर दिने गरिए जस्तै प्रदेश २ सरकारले पनि प्रादेशिक संरचनाभित्र क्षमतावान खेलाडीहरुलाई समावेश गर्ने नीति लिएको उनले बताए ।
मुख्यमन्त्री राउतले खेल क्षेत्रलाई उत्कृष्ट बनाउन प्रदेश सरकारले प्रत्येक जिल्लामा प्रदेशस्तरीय र प्रदेशभित्र कम्तिमा ३÷४ वटा अन्तर्राष्ट्रिय स्तरको रंगशाला बनाउने सोच समेत बनाएको जानकारी दिए ।
कार्यक्रममा भौतिक पूर्वाधार विकास मन्त्री जितेन्द्र सोनलले प्रदेश नम्बर २ खेलाडीहरुको उर्वर भूमि रहेको बताए । आधुनिक खेलका साथै मधेशका पारम्परिक खेलहरुको जगेर्ना गर्ने समेत प्रदेश सरकार प्रयत्नशिल उनले दावी गरे ।
प्रतिक्रिया दिनुहोस !
