सुर्खेत : लागुपदार्थ ब्राउन सुगरसहित प्रहरीले एक जोडीलाई पक्राउ गरेको छ ।
सुर्खेतको वीरेन्द्रनगरमा समिट टेन्ट हाउसका सञ्चालक सलिन सिद्धिकी र सहनाज सिद्धिकीलाई इलाका प्रहरी कार्यालय छिन्चुले पक्राउ गरेको हो ।
विशेष सुराकीको आधारमा इलाका प्रहरी कार्यालय छिन्चुका प्रहरी निरीक्षक निरोज चौलागाईँको नेतृत्वमा खटिएको टोलीले सिद्धिकीद्वयलाई पक्राउ गरेको छ । प्रहरीले उनीहरुबाट १५ क्वार्टर ब्राउन सुगर बरामद गरेको छ । भारतको रुपैडियाबाट उनीहरुले ब्राउन सुगर ल्याएको प्रारम्भीक अनुसन्धानबाट खुलेको छ ।
भे ७ प ५०५८ नम्बरको मोटरसाइलको सिटमुनी लुकाएको अवस्थामा ब्राउन सुगर फेला परेको सुर्खेत प्रहरीले जानकारी दिएको छ । उनीहरुलाई अदालतबाट म्याद थप गरेर छिन्चु प्रहरीले अनुसन्धान सुरु गरेको छ ।
एकसाता अघि छिन्चु प्रहरीले वीरेन्द्रनगर नगरपालिकामा कार्यरत कुचिकार इन्द्रजीत बाल्मिकीलाई समेत ६.८१० ग्राम ब्राउन सुगरसहित पक्राउ गरेको थियो । विस्कुटमा ब्राउन सुगर लुकाएर ल्याउँदै गर्दा बाल्मिकीलाई प्रहरीले पक्राउ गरेको हो ।
प्रतिक्रिया दिनुहोस !
