विप्लव समुहका नवलपुर उपप्रमुख सहित दुई कार्यकर्ता पक्राउ
चैत १४, २०७५ बिहीबार १७:२४:०
नवलपुर : नेत्रविक्रम चन्द ‘विप्लव’ नेतृत्वको नेकपाकाका ‘पूर्वी नवलपरासी जनपरिषद’ का उपप्रमुख सहित दुई कार्यकर्ता पक्राउ परेका छन् ।
देवचुली नगरपालिका–४ का दीपककुमार घर्ती र सोही ठाउँका पारस गौतम बिहीबार दिउसो पक्राउ परेका हुन् । घर्ती जनपरिषदका जिल्ला उपप्रमुख हुन् भने गौतम विप्लव समुहका जिल्ला सदस्य रहेको जिल्ला प्रहरी कार्यालयका नायब उपरीक्षक अर्जुन रानाभाटले जानकारी दिए ।
उनीहरु दुबैलाई घर नजिकैबाट पक्राउ गरिएको थियो । बुधबार विप्लवको भ्रातृ संगठनका रुपमा रहेको ‘जनपरिषद’ का जिल्ला प्रमुख दानबहादुर आचार्य र जिल्ला सदस्य धनबहादुर मर्दनिया पक्राउ परेका थिए । पक्राउ परेका आचार्य र मर्दनियालाई ‘राष्ट्र सेवक कर्मचारीमाथि हातपात गरेको’ अभियोगमा मुद्दा चलाइएको नायब उपरीक्षक रानभाटले जानकारी दिए ।
बिहीबार पक्राउ परेका घर्ती र गौतममाथि भने आवश्यक अनुसन्धान भइरहेको प्रहरीले जनाएको छ ।
प्रतिक्रिया दिनुहोस !
