काठमाडौं : निजी क्षेत्रको पहलमा नेपालमा करिब डेढ अर्ब रुपैयाँको लगानीमा अत्याधुनिक भण्डारण गृह निर्माण हुने भएको छ । भारतको नेसनल कोल्याट्रल म्यानेजमेन्ट कम्पनीको प्राविधिक सहयोगमा नेपाल वेयर हाउजिङ कम्पनी लिमिटेडले सुनसरी, पर्सा र कपिलवस्तुमा अत्याधुनिक गोदाम घर निर्माण गर्न लागेको हो ।
निम्बस होल्डिङका प्रबन्ध निर्देशक आनन्द बगारियाकाअनुसार ५५ हजार मेट्रिक टन क्षमताको एक अर्ब ३५ करोड लगानीमा तीन जिल्लामा गोदाम घर निर्माण हुने भएको छ । निम्बस होल्डिङको लगानी रहेको यो गोदामसम्बन्धी परियोजनाका लागि शुक्रबार आयोजना हुने नेपाल लगानी सम्मेलनको क्रममा समझदारी पत्रमा नेसनल कोल्याट्रल म्यानेजमेन्ट कम्पनीका सीईओ अनुपम कौशिक र निम्बसका तर्फबाट बगारियाले हस्ताक्षर गर्दै छन् ।
गोदाममा गहुँ, मकै, भटमास र धानसमेत भण्डारण गर्न सक्ने सुविधा उपलब्ध हुनेछ । किसानले ल्याएका अन्नलाई सफा गरी उचित तापक्रममा लामो समयसम्म सुरक्षित रूपमा राख्न सकिने व्यवस्था गरिनेछ । यो परियोजनामार्फत किसानलाई बैंकबाट ऋण सुविधा पनि उपलब्ध गराउने तयारी गरेको छ ।
परियोजनाले किसानलाई विभिन्न बैंकसँगको साझेदारीमा वेयर हाउजिङ रसिदको सेवा उपलब्ध गराउने तयारी छ । यसअनुसार किसानले ल्याउने अन्नको उचित मूल्यांकन गरी रसिद प्रदान गरिनेछ । किसानले उक्त रसिद कम्पनीको हातामा रहने बैंकमा बुझाएर अन्नको मूल्यको ७० प्रतिशतसम्म कर्जा लिन पाउने सुविधा उपलब्ध गराइनेछ ।
नेसनल कोल्याट्रल म्यानेजमेन्ट कम्पनी भारतमा अग्रणि अन्न व्यवस्थापन कम्पनीको रूपमा गनिन्छ । भारतका विभिन्न आठ सयभन्दा बढी स्थानमा यो कम्पनीले अन्नसम्बन्धी व्यवस्थापन गर्दै आएको छ ।
प्रतिक्रिया दिनुहोस !
