भैरहवा : बुधवार भारतीय नागरिक फिरोज खानको गोली हानी हत्या गरिएको घटनाको अनुसन्धान अन्तिम चरणमा पुगेको छ । बुटवलको मैनाबगरस्थित ज्योती इन्जिनियरिङ वर्कसपमा मिस्त्रिको रुपमा कार्यरत खानको बुधवार राति गोली हानी हत्या गरिएको थियो ।
रुपन्देहीका प्रहरी प्रमुख एवं प्रहरी उपरीक्षक हृदय थापाले फिरोज खानको हत्या घटनामा सुक्ष्म तरिकाले अनुसन्धान भइरहेको बताउँदै केही दिनमै परिणाम आउने दावी गरेका छन् । घटनाको अनुसन्धानमा फिरोजको हत्या उनको पारिवारिक कारण रहेको देखिएको प्रहरीले स्रोतले बताएको छ ।
‘घटनाको अनुसन्धानमा फिरोजको नजिकको व्यक्ति र उनको श्रीमतीको कनेक्सन देखिएको छ’ प्रहरी स्रोतले भन्यो । तर घटना अनुसन्धानको क्रममा नै छ, अपराधी छिट्टै पक्राउ पर्छन् ।
फिरोजको हत्याको घटनामा प्रहरीले उनको श्रीमती उपर पनि अनुसन्धान गरिरहेको बुझिएको छ । फिरोजलाई निकै नजिकबाट गोली हानिएको र घटनामा कटुवा पेस्तोलको प्रयोग भएको पाइएको छ । जुन सहजै उपलब्ध हुने हतियार हो । सरल स्वभावका ४० वर्षीय फिरोज बिहार प्रदेशको बेतियाका बासिन्दा हुन् ।
प्रतिक्रिया दिनुहोस !
