न्युयोर्क : उपप्रधान तथा रक्षामन्त्री ईश्वर पोखरेलले नेपाली सेनालाई उच्च पदमा समेत समावेश गराउन राष्ट्र संघीय उच्च अधिकारीसँग आग्रह गरेका छन् । विश्व शान्तिमा नेपाली सेना र अन्य सुरक्षा फौजले निर्वाह गरेको भूमिकाको विश्वले प्रशंसा गरिरहेको बताए । नेपाली सेनाको पदीय अनुपातमा उच्च तहमा अवसर पाउनुपर्ने माग उनले राखेका हुन् । उनले राष्ट्र संघका महासचिव एन्टेनियो गुटेरेससँगको भेटवार्ता र राष्ट्र संघीय शान्ति मिसन सम्मेलनलाई सम्बोधनमा उनले त्यस्तो माग गरेका हुन् ।
विश्व शान्तिका लागि नेपाली सेनाले खेलेको भूमिकाको उच्च प्रशंसा सबैबाट हुने गरेको तर उसले उच्च स्तरमा किन जिम्मेवारी नपाएको भन्दै यस्ता विषयमा राष्ट्र संघ न्यायसंगत ढंगले अघि बढ्न पर्ने बताए । उनले नेपाली सेनाको गौरवमय इतिहासको प्रशंसासमेत गर्दै सहकार्यमा अब्बल भएको बताए । उनले यस्तो धारणा आफूले विदेशीबाट नै पाएको पनि बताए । मन्त्रीस्तरीय सम्मेलनमा रक्षामन्त्री पोखरेलले शान्ति स्थापनार्थ खटिएको नेपाली सेनाको भूमिका, सहभागिता र क्षमता अभिवृद्धिबारे नेपालका तर्फबाट प्रस्तावहरू पेस गरेका थिए ।
मन्त्रीस्तरीय सम्मेलनमा रक्षामन्त्री पोखरेलले नेपाली सेना र नेपाल प्रहरीको योगदानबारे अन्तर्राट्रिय जगतलाई जानकारी गराएका हुन् । विश्वका ११ देशका १२ वटा मिसनमा ५ हजारभन्दा बढी नेपाली सैनिक शान्ति स्थापनाका लागि कार्यरत छन् । उनले राष्ट्र संघका महासचिव गुटेरेससँग नेपालको पछिल्लो राजनीतिक अवस्था र विकासको सन्दर्भमा पनि छलफल भएको बताइएको छ । भेटघाटमा शान्ति स्थापनार्थ राष्ट्र संघले विश्वभरि खेलेको भूमिका र नेपालको हितबारे छलफल भएको जानकारी नियोगले दिएको छ । उनले नेपाली सेनाले अझै ५ हजार सैनिक शान्ति मिसनमा खटाउन सक्ने स्पष्ट पारे । विश्वका शक्तिराष्ट्र र शक्तिउन्मुख राष्ट्रले उच्च तहमा आफ्ना सैनिक पठाउँदा समस्या भएको हो ।
भेटघाटमा रक्षामन्त्री पोखरेलले शान्ति स्थापनार्थ नेपालले ६ दशकदेखि निर्वाह गरिरहेको भूमिका, त्यसमा खटिने सुरक्षाकर्मीको रक्षा, सुरक्षाबारे नेपालको चासोसमेत व्यक्त गरेको राष्ट्र संघका लागि स्थायी नियोगले जानकारी दिएको छ । उनी नेपाली सेनाका महासेनानी चोकबहादुर ढकाल र परराष्ट्र मन्त्रालयका सहसचिव धनश्याम भण्डारीसहितको प्रतिनिधिमण्डलको नेतृत्व गर्दै बुधबार न्युयोर्क आएका हुन् । न्युयोर्कस्थित नेपालको वाणिज्य दूतावास, नेकपा समर्थित प्रवासी नेपाली मञ्चलगायतले आयोजना गर्ने छलफल तथा अन्तरक्रियामा समेत उनी सहभागी भए ।
प्रतिक्रिया दिनुहोस !
