दैवको दुश्मनी

दैवले किन देख्‍न सक्दैन हँ ?

झिंगटी र फुसले बारेको

मझेरीमा चुलो बलेको ?

महाजनले हडपेर बाँकी रहेको जग्गामा

चारवटा खाँबो ठड्याएर

पराल बेरेको गुँडमा

बचेराले चारोको हाहाकार गरेको बेला

किन आँधी पठाउँछ ?

तहसनहस बनाउन ?

पैतालो हाल्न

आफ्नै नामको लालपुर्जा नभएको

जाबो जोताहासँग

कुन ईख पालेर

दैबले खेदिरहन्छ हँ ?

अस्ति भर्खर त हो

शीतलहरको बहानामा

अघिल्लो हुरीमा जोगिएका

छिमेकको काख रित्याएको

त्यही शोकमा आँसु बगाउँदै गरेको

थाहा हुदाँ हुँदै

मध्यरातमा किन चक्रवात पठाएको

मेरो बस्तिमा ?

कुनै दिन सग्लो बाँच्न नसकेको

जाबो सडकछापसँग

किन यत्रो दुश्मनी ?

गएको बर्खा त हो

बस्तीमा बाढी हुलेर

निमोठिएको भतिज कमल

बिसाउने भूइँसम्म नहुँदा

कोशीमा बगाएको ।।

शोकमा बाँच्न बानी परेको ठानेर

यामैपिच्छे

झूपडीको बस्तीमा नरसंहार मच्चाउने

ए दैव,

तँ विरुद्द जन्मकैदको सजायँ मागदाबी सहित

न्याय माग्न कुन अदालत जाउँ ?