धनकुटा : पाख्रिवास नगरपालिका ५ दियालेका आशिष मगर बेपत्ता भएको एक महिना बित्न लाग्दा समेत भेटिएका छैनन्। गत फागुन २० गते शिवरात्री दिन घरबाट निस्किएका उनी अझै घर नआएका उनका भिनाजु टिका भुजेलले बताए।
उनका अनुसार शिवरात्रीको दिन बिहानभर घरमा काम गरेर दिउँसो तीन बजे दोकान जान्छु भन्दै उनी हिँडेका थिए। तीन दिनसम्म पनि घर नआएपछि परिवारले इलाका प्रहरी कार्यालय पाख्रिवासमा खोजतलासका लागि उजुरी दिएका थिए।
उजुरी दिएपनि प्रहरीले खोजतलासमा चासो नदिएको उनका भिनाजु भूजेलले आरोप लगाए। यता इलाका प्रहरी कार्यालय पाख्रीवासका इञ्चार्ज प्रेमबहादुर कार्कीले उजुरी आएको दिन जिल्ला प्रहरी कार्यालय पठाइएको बताए।
‘जिल्ला कार्यालयमा बुझ्दा खोजी भइरहेको जानकारी पाएको छु। सबैतिरबाट खोजीकार्य हुँदैछ’, उनले भने।
परिवारले पनि आफ्नै सक्रियतामा पाख्रिवास आसपासका विभिन्न स्थानका साथै छिमेकी जिल्ला भोजपुरको सानो दुम्वा, ठूलो दुम्वा, सदरमुकाम, प्याउली, हिलेभञ्ज्याङ्गको जंगल, जरायोटार लगायतका स्थानमा खोजी कार्य गरिरहेको छ। तर अझै सम्म पनि बेपत्ता युवकलाई भेट्न नसकिएको भूजेलले बताए।
एक महिनादेखि बेपत्ता पाख्रिवास नगरपालिका ५ दियालेका आशिष मगर।
प्रतिक्रिया दिनुहोस !
