अन्तर–कोरियाली सैनिक सम्झौता सुदृढ बनाइने
योनहाप । सोल : दक्षिण कोरिया र अमेरिकाका रक्षा प्रमुखहरूले गत वर्ष उत्तर कोरियासँग भएको अन्तर–कोरियाली सैनिक सम्झौतालाई निरन्तरता दिने प्रतिबद्धता व्यक्त गरेका छन् । दुबै पक्षबीच सीमामा तनाव कम गर्न र विश्वासको वातावरण निर्माण गर्न गत वर्ष अन्तरकोरियाली सैनिक सम्झौता भएको थियो । वासिङटनमा सम्पन्न वार्तामा दक्षिण कोरियाका रक्षामन्त्री जियोङ क्योङ–डु र कार्यवाहक अमेरिकी रक्षामन्त्री प्याट्रिक शानाहानबीच उत्तर कोरियासँग हुनसक्ने सम्भावित युद्धको अवस्थामा त्यसको सञ्चालन नियन्त्रणसम्बन्धी अख्तियारी सोललाई प्रदान गर्नेसम्बन्धी अमेरिकी शर्तका बारेमा पनि छलफल भएको थियो ।
‘दुबै पक्षले बृहत् सैनिक सम्झौता (सीएमए) को कार्यान्वयनबाट कोरियाली प्रायद्वीपमा सैनिक तनाव न्यून गर्न र आत्मविश्वास निर्माण गर्न खेलेको भूमिकाको बारेमा मूल्यांकन गरिएको छ’, दुबै देशका रक्षा मन्त्रालयबाट जारी विज्ञप्तिमा उल्लेख छ ।
गत सेप्टेम्बरमा उत्तर कोरियाका नेता किम जोङ–उनको मैत्रीपूर्ण निमन्त्रणामा दक्षिण कोरियाका राष्ट्रपति मुन जे–इनको उत्तर कोरियाको भ्रमणका क्रममा उक्त सीएमएमा दुबै देशका रक्षामन्त्रीले हस्ताक्षर गरेका थिए । दुबै पक्षबीच विश्वास निर्माण तथा हतियार नियन्त्रण उपायका बारेमा छलफल गर्ने सहमति भएको थियो ।
जियोङ र शानाहानबीच उत्तर कोरियासँगको शान्ति प्रक्रियालाई सहजीकरण गर्नेतर्फ दुबै देशका सेनाले मिलेर कार्य गर्ने सहमति पनि भएको छ । दक्षिण कोरियाका राष्ट्रपति मुन अप्रिल ११ मा अमेरिकी राष्ट्रपति डोनल्ड ट्रम्पसँग भेटघाट गर्न वासिङटन प्रस्थान गर्ने कार्यक्रम छ ।
उत्तर कोरियामा रूसी गृहमन्त्री
रूसी गृहमन्त्रीको नेतृत्वमा वरिष्ठ अधिकारी सम्मिलित प्रतिनिधिमण्डल उत्तर कोरिया आइपुगेको छ । कोरियाली केन्द्रीय समाचार समिति (केसीएनए) ले रूसी गृहमन्त्री भ्लादिमिर कोलोकोल्सेभको नेतृत्वमा उक्त टोली सोमबार प्योङयाङ भ्रमणमा आएको जनाएको छ ।
उत्तर कोरियाली नेता किम जोङ उनले यसै महिनाभित्र रूसी राष्ट्रपति भ्लादिमिर पुटिनको निमन्त्रणमा रूसको भ्रमण गर्ने सम्भावना छ । उक्त भ्रमणको तयारीका लागि रूसी गृहमन्त्रीको भ्रमण भएको अडकलबाजी गरिएको छ । केही समयअघि मात्र कार्यवाहक सेनाप्रमुख किम चाङ–सोनले मस्को र भ्लादिभोस्तकको भ्रमण गरेका थिए ।
उत्तर कोरियाली नेता किमले अमेरिकी राष्ट्रपति ट्रम्पसँग शिखर बैठक गर्नुअघि चारपटक चीनको भ्रमण गरे पनि सत्ता सम्हालेयता रूस भ्रमण गरेका छैनन् । हाल, उत्तर कोरियाले रूससँगको सम्बन्ध सुदृढ बनाउन कूटनीतिक पहल तीव्र बनाएको छ । हनोई वार्तामा सोचेजति प्रगति नभएपछि उत्तर कोरियाले कूटनीतिक पहल तीव्र बनाउन लागेको हो ।