काठमाडौं : निर्माणाधीन काठमाडौं–निजगढ (फास्ट ट्र्याक) मा गुड्ने सवारीसाधनको सडक दस्तुरसहित कोरियाली कम्पनी सुसुङले विस्तृत अध्ययन प्रतिवेदन (डीपीआर) तयार पारेको छ।
फास्ट ट्र्याकमा चल्ने सवारीसाधनलाई साना, मध्यम र ठूला तीन वर्गमा विभाजित गरी दस्तुर तोकिएको छ। दैनिक १२ हजार ५ सय १८ गाडी ओहोरदोहार गर्ने अनुमानसहित डीपीआरमा सडक दस्तुर तोकिएको उच्च स्रोतले बतायो। डीपीआर मन्त्रिपरिषद्मा पेस भएको छ।
काठमाडौंदेखि निजगढसम्म साना गाडीको ९ सय, मध्यमको १ हजार ९ सय र ठूला (हेभी) को २ हजार ६ सय दस्तुर निर्धारण गरिएको छ। कार, जिप र माइक्रोबसलाई साना, बसलाई मध्यम र ट्रकलगायत ठूला साधनलाई हेभी सवारीका रूपमा व्याख्या गरिएको छ। मोटरसाइकलबारे भने डीपीआरमा केही उल्लेख छैन।
काठमाडौं, नारायणगढ, हेटौंडा हुँदै निजगढसम्म पुग्न अहिले लाग्ने इन्धन खर्च र समय बचतका हिसाबले सडक दस्तुर सस्तो भएको डीपीआरमा उल्लेख छ। ७२ देखि ७६ किमिसम्मको लम्बाइको अनुमान गरिएको उक्त सडकमा काठमाडौं–हेटौंडा र हेटौंडा निजगढसम्मका लागि गुड्ने सवारीसाधनको पनि दस्तुर निर्धारण गरिएको छ। काठमाडौंबाट हेटौंडासम्म साना गाडीको ६ सय, मध्यमको १ हजार ३ सय र ठूला गाडीको १ हजार ८ सय निर्धारण गरिएको छ। हेटौंडादेखि निजगढसम्म चल्ने साना गाडीको तीन सय, मध्यमको ६ सय र ठूलाको ८ सय दस्तुर निर्धारण गरिएको स्रोतले बतायो।
फास्ट ट्र्याकमा तीनवटा इन्टर सेक्सन (प्रवेश विन्दु) प्रस्ताव गरिएका छन्। काठमाडौंको खोकना, बाराको निजगढ र मकवानपुरको बुधुनेबाट मात्र फास्ट ट्र्याकमा सवारी प्रवेश गर्न पाइनेछ। काठमाडौं–निजगढ यात्रा अवधि १ घन्टा २ मिनेट ३३ सेकेन्डको हुनेछ।
चार वर्ष ६ महिना निर्माण अवधि तोकिएको फास्ट ट्र्याकको लागत भने यसअघि अनुमान गरिएभन्दा झन्डै दोब्बर हुने भएको छ। सुसुङले दुई खर्ब १३ अर्ब ९५ करोड ३२ लाख २० हजार ५ सय २७ रुपैया ७४ पैसा लाग्ने अनुमान गरेको छ। एसियाली विकास बैंक (एडीबी) ले तयार पारेको सम्भाव्यता अध्ययन प्रतिवेदनमा भने झन्डै एक खर्ब लागत अनुमान गरिएको थियो।
फाट ट्र्याकका लागि महादेवटार, धाद्रे र लेनडाँडामा तीन वटा सुरुङ बनाउने प्रस्ताव छ। ठूला, साना र मध्यम गरी ७१ वटा पुलको प्रस्ताव छ। पुलको लम्बाइ १० किलोमिटर भन्दा बढी हुने, एक सय ३४ बक्स र एक सय सातवटा पाइप कल्भर्ट निर्माण गर्नुपर्नेछ। अन्य सडक जोडिने स्थलमा फास्ट ट्र्याकलाई कि त माथिबाट कि त जमिनमुनिबाट लैजानुपर्ने डीपीआरमा प्रस्ताव रहेको स्रोतले बतायो। ११ मिटर फराकिलो हुने उक्त सडकको दायाँ दुई र बायाँ एक मिटर भाग लेनका रूपमा विकास गर्नुपर्ने प्रस्ताव छ।
प्रतिक्रिया दिनुहोस !
