काठमाडौं : यस वर्षको नेपाल मानवअधिकार अन्तर्राष्ट्रिय चलचित्र महोत्सव राजधानीमा सुरु भएको छ । सातौं संस्करणको रुपमा बिहीबार सुरु भएको महोत्सवमा फिल्महरु बसाइसराइको विषयमा प्रतिष्पर्धा गर्दै छन् ।
कमलपोखरीस्थित बिहीबार रसियन कल्चर सेन्टरमा सांगीतिक प्रस्तुतीसहित महोत्सव सुरु भएको हो । उद्घाटनसँगै ८० मिनेटको जर्मन फिल्म ‘द मार्च अफ होप स्काई’ प्रदर्शन गरिएको थियो ।
‘सुरक्षित, व्यवस्थित र आत्मसम्मानित आप्रवासन’ नारासहित सुरु महोत्सवमा ३३ देशका ८२ वटा सबै प्रकृतिका फिल्म प्रदर्शन हुने छन् । नेपालका भने २० भन्दा धेरै फिल्म प्रदर्शन हुँदै छन् ।
चारदिने महोत्सवको अवधिभर फिल्म तथा मानवअधिकारका विषयमा केन्द्रित केही बहसमुलक कार्यक्रम पनि हुने महोत्सव निर्देशक पाण्डव खत्रीले जानकारी दिएका छन् ।
महोत्सवका लागि नेपालको तर्फबाट फिल्म समिक्षक अनुप सुवेदी, कोरियाली फिल्म समिक्षक चाङ सेवक योङ, मलेसियाका आना हर मेइ योके र रसियाली लेखिका लिया गिल्मुट्डिनोभा निर्णायक मण्डलमा छन् ।
फिल्मकर्मी तथा सयौं दर्शकका माझ सुरु उद्घाटन समारोहमा मानवअधिकार आयोगका अध्यक्ष अनुपराज शर्मा र कुटनीतिक नियोगका प्रतिनिधिहरुले महोत्सवका लागि शुभकामना प्रदान गरेका थिए ।
यस्तै मानवअधिकार चलचित्र केन्द्रका अध्यक्ष विष्णु खत्री, महोत्सवका अध्यक्ष अरुणदेव जोशी, महोत्सव निर्देशक पाण्डव खत्री लगायतले आगन्तुकहरुलाई स्वागत गर्दै महोत्सवबारे बोलेका थिए । आइतबार सम्पन्न हुने महोत्सवमा विभिन्न विधामा उत्कृष्ट फिल्मलाई पुरस्कृत गरिने छ ।
प्रतिक्रिया दिनुहोस !
