भारतीय प्रधानमन्त्री मोदी अन्तर्वार्ता दिइरहँदा यसरी खनिए मिडियाविरुद्ध !

नयाँदिल्ली : भारतीय प्रधानमन्त्री नरेन्द्र मोदी आज मिडियाविरुद्ध आक्रामक रुपमा प्रस्तुत भए । एबिपी न्युज च्यानलका लागि दुई पत्रकारले अन्तरवार्ता लिइरहँदा क्यामेरामै उनीहरुविरुद्ध आक्रामक बनेका हुन् ।

मोदीले एबिपी न्युजले अदालतको फैसला समेत नमानेको भन्दै त्यसमा आपत्ति जनाएका छन् । ‘एबिपी न्युज सर्वोच्च अदालतको फैसला मान्दैन भने यसभन्दा ठूलो बिडम्वना के हुनसक्छ ?’ मोदीले सोधे ।

यससँगै उनले केही आरोप समेत एबिपी न्युजाका विरुद्ध लगाएका थिए । अन्तरवार्ताको क्रमममा प्रश्न रोकेरै तीनवटा आरोप लगातार प्रस्तुत गरेका थिए ।

‘के भारत सरकारले संसदमा बोलेको कुरा पनि एबिपी न्युज मान्न तयार छैन ?’ उनले उक्त मिडियाका पत्रकारलाई सिधा प्रश्न गरे । मोदीले एबिपी न्युज च्यानल पूर्वाग्रही भएको समेत टिप्पणी गरेका थिए । गान्धी परिवार भ्रष्टाचारमा मुछिएको भन्दै वित्तमन्त्रीले पत्रकार सम्मेलन गर्दा समेत यसबारे एबिपी न्युजले समाचारलाई महत्व नदिएको मोदीको तर्क छ ।

अन्तर्वार्ता लिने पत्रकारलाई नै उनले ‘तपाईँहरुको के बाध्यता छ ?’ भन्दै प्रतिप्रश्न समेत गरे । प्रधानमन्त्री मोदीले एबिपीलाई दिएको अन्तरवार्ताको उक्त भिडियो सामाजिक संजालमा समेत भाइरल बनाइएको छ । ‘पीएम मोदी अन एबिपी न्युज’ नामको ह्यासट्यागमा उक्त भिडियो अहिले चर्चामा आएको छ ।