प्रदेश ब्युरो । बुटवल : आठौं राष्ट्रिय खेलकुद प्रतियोगितामा प्रदेशहरूलाई पछि पार्दै विभिन्न विधाका खेलमा विभागीय टिमले स्वर्णको खाता खोलेका छन् । नेपाल पुलिस, आर्मी र एपीएफले स्वर्ण प्राप्त गरेका छन् ।
बुटवलमा जारी लन टेनिस प्रतियोगितामा दुई स्वर्णको टुंगो लागेको छ । पुरुषतर्फ एपीएफ र महिलातर्फ नेपाली सेनाले स्वर्ण हात पारेका हुन् । आठौं राष्ट्रिय प्रतियोगिताअन्तर्गत देवीनगरस्थित लन टेनिस कोर्टमा बिहीबार भएको टिम इभेन्टतर्फको खेलमा नेपाली सेना र सशस्त्र प्रहरीलाई स्वर्ण हात परेको हो ।
पुरुष टिम इभेन्टमा सशस्त्र प्रहरी एपीएफले नेपाली सेनालाई ३–० को सेटमा पराजित गर्दै स्वर्ण जितेको छ । नेपाली सेनाले दोस्रो हुँदै रजत पदक पायो । प्रदेश ४ र एनआरएनको टिमले तृतीय हँुदै कांस्य पदक पाएका छन् । यसैगरी महिला टिम इभेन्टतर्फ नेपाली सेनाले सशस्त्र प्रहरी बलको एपीएफलाई २–१ को सेटमा पराजित गर्दै स्वर्ण हात पार्यो । एपीएफ क्लबले रजत पदकमा चित्त बुझायो । प्रतियोगितामा प्रदेश ३ र प्रदेश ४ ले तृतीय हँुदै कांस्य पदक पाए ।
बिहीबार खुला इभेन्टतर्फका खेलहरू सम्पन्न भएका छन् । खुलाको मेन्स सिंगलमा भीष्म काउचा सञ्जय श्रेष्ठलाई ७–५, ६–३, ७–६ ले पराजित गरी क्वार्टरफाइनलमा प्रवेश गरेका छन् । यसैगरी संरक्षकभूषण वज्राचार्य दावा सोनाम शेर्पालाई ६–३, ६–१ ले पराजित गर्दै क्वार्टरफाइनलमा प्रवेश गरे । यसैगरी नवीन मगर इवेक जोशीलाई ६–१, ६–१ सेटमा पराजित गर्दै क्वार्टरफाइनलमा प्रवेश गरेका छन् । अर्को खेलमा सम्यकभूषण वज्राचार्य निशान्त श्रेष्ठलाई ६–०, ६–० को सेटमा पराजित गर्दै क्वार्टरफाइनलमा प्रवेश गरे ।
त्यस्तै महिला सिंगलमा पे्ररणा कोइराला एनी माथेमालाई ६–२, ६–२ को सेटमा पराजित गर्दै सेमिफाइनलमा प्रवेश गरेका छन । यसैगरी रायना शाह श्रीया भट्टराईलाई ६–१, ६–१ को सोझो सेटमा पराजित गर्दै सेमिफाइनलमा प्रवेश गरेका छन् ।
यसैगरी बिहीबार नै भएको मेन्स डबल्सतर्फको खेलमा रामबहादुर विक र शेषमणि चौधरीको जोडीले निशान्त श्रेष्ठ र कुमार जीसीको जोडीलाई ७–५, ६–३, १०–६ ले पराजित गर्दै क्वार्टरफाइनलमा स्थान बनायो । चन्द्र थापा र विकास खड्काको जोडी कृष्ण गोविन्द र शिवराम मगरको जोडीलाई ६–१, ६–१ ले पराजित गर्दै क्वार्टरफाइनलमा प्रवेश गर्यो । यसैगरी संरक्षकभूषण वज्राचार्य र अमृत पौडेलको जोडी भीष्म काउचा र सञ्जय श्रेष्ठको जोडीलाई ६–१, ६–३ को सेटमा पराजित गर्दै क्वार्टरफाइनलमा प्रवेश गर्यो ।
मिक्स डबल्सतर्फको खेलमा अनिल शाही र गंगा शर्माको जोडी आत्माराम कार्की र इन्द्रकला श्रेष्ठको जोडीलाई ६–०, ६–२ को सेटमा पराजित गर्दै क्वार्टरफाइनलमा प्रवेश गर्यो । प्रणव खनाल र अभिलाष विष्टको जोडी गोविन्द नेपाली र विमला बस्यालको जोडीलाई ६–१, ६–२ को सोझो सेटमा पराजित गर्दै क्वार्टरफाइनलमा प्रवेश गर्यो । यसैगरी आइभन लिसानोभिच र अस्लेशा लिसानोविचको जोडी निशान्त श्रेष्ठ र अल्सा रेग्मीलाई ६–३, ६–२ को सेटमा पराजित गर्दै क्वार्टरफाइनलमा प्रवेश गर्यो ।
राष्ट्रिय प्रतियोगिताअन्तर्गत रुपन्देहीमा पुरुष र महिला गरी मेन्स सिंगल, मेन्स डबल्स, वुमन सिंगल, वुमन डबल्स, मिक्स डबल्स, टिम इभेन्ट गरी सातवटा स्वर्ण पदकका लागि प्रतिस्पर्धा भइरहेको छ । प्रतियोगितामा प्रदेश ३, ४, ५, नेपाली सेना, सशस्त्र प्रहरी बलको एपीएफ क्लब र एनआरएनका २८ पुरुष र १५ महिला खेलाडी सहभागी छन् । प्रतियोगिता वैशाख २ सम्म चल्ने छ ।
टेबुल टेनिसमा पुलिसलाई दुई, एपीएफलाई एक स्वर्ण
दाङ : आठौं राष्ट्रिय खेलकुद प्रतियोगिता अन्तर्गतको पहिलो स्वर्ण पदक नेपाल पुलिस क्लबले जितेको छ । दाङको घोराहीमा बुधबारदेखि सञ्चालन भएको टेबुल टेनिस प्रतियोगितामा प्रतियोगिताकै पहिलो स्वर्ण पदक टेबुल टेनिसको महिला टिम इभेन्टमा पुलिसले जितेको हो । पुलिसले फाइनलमा एपीएफ क्लबलाई ३–१ को सेटमा हराउँदै स्वर्ण जितेको हो ।
पुलिसकी एलिना महर्जनले सेलिषा खड्गीलाई ३–२ तथा नविता श्रेष्ठले अनिता महर्जनलाई ३–० ले पराजित गरिन् । मञ्जु सुवाल एपीएफकी सिक्क सुवालसँग ३–१ ले हारेकी थिइन् । तर, नविताले सेलिषालाई ३–१ को सेटमा हराएपछि पुलिसले आठौं राष्ट्रिय खेलकुदको पहिलो स्वर्ण पदक जितेको आयोजकले जनाएको छ ।
यसैगरी महिला डबल इभेन्टमा पनि पुलिसले स्वर्ण जितेको छ । नेपाल आर्मी क्लबलाई हराउँदै नेपाल पुलिस क्लबले स्वर्ण जितेको हो । पुलिस क्लबका नवीना श्रेष्ठ, एलिना महर्जन, रविना महर्जन, स्वेच्छा नेम्बाङले डबल महिला इभेन्टमा स्वर्ण पदक जितेका टेबल टेनिस संघ दाङका उपाध्यक्ष अरुण लहरेले जानकारी दिए ।
यसैबीच पुरुषतर्फको टेबल टेनिसतर्फ पनि विभागीय टिमले नै स्वर्ण पदक जितेको छ । नेपाल पुलिसलाई हराउँदै एपीएफले पुरुषतर्फ स्वर्ण पदक जितेको हो । दाङका भइरहेको बास्केट बल प्रतियोगितामा नेपाल पुलिस क्लब, नेला आर्मी क्लब, प्रदेश ५ र सुदूरपश्चिम प्रदेशले विजयी सुरुआत गरेका छन् ।
आर्मी, पुलिस र सुदूरपश्चिम विजयी
नेपालगन्ज : आठौं राष्ट्रिय खेलकुदको हक्की प्रतियोगिता नेपाल पुलिस, त्रिभुवन आर्मी र सुदूरपश्चिम प्रदेश विजयी भएका छन् । नेपालगन्जको मंगलप्रसाद माविको खेल मैदानमा बिहीबार भएको पहिलो खेलमा नेपाल पुलिस क्लबले गण्डकी प्रदेशलाई ५–० ले हरायो । नेपाल पुलिस क्लबका रोमन राना एक्लैले पाँच गोल गरेका थिए ।
बिहीबार नै भएको हक्कीको दोस्रो खेलमा नेपाल आर्मीले प्रदेश २ लाई १–० ले हरायो । आर्मीको जितमा राम शाहले गोल गरे । बिहीबार अपराह्न भएको तेस्रो खेलमा सुदूरपश्चिम प्रदेशले कर्णाली प्रदेशलाई ३–० ले हरायो । सुदूरपश्चिमका लागि राम परियारले पहिलो गोल गरे । भीमदत्त भट्ट र कान्तुराम पनेरूले पनि एक एक गोल थपे ।
प्रतिक्रिया दिनुहोस !
