बुटवल : आठौँ राष्ट्रिय खेलकुद प्रतियोगिता अन्तर्गत रुपन्देहीमा जारी लन टेनिस प्रतियोगितामा दिदीभाईको जोडीले स्वर्ण पदक हात पारेका छन्।
मिश्रित डबल्सतर्फ एपीएफका आईभर लिसानोविभ र अश्लेवा लिसोनोविभको जोडीले अभिलाषा विष्ट र प्रनव खनालको जोडीलाई पराजित गरे। स्वर्ण पदकका लागि दिदीभाईले ३–६, ६–४, १०–७ को सुपर ट्राईबेकरमा जित निकालेका हुन्।
आर्मीका विष्ट र खनालको जोडीले खेलमा पहिलो सेटमा जित निकाल्दै अग्रता लिएपछि रजत पदकमा चित्त बुझाउनु पर्यो। यसैगरी प्रदेश नम्बर ४ का अनिल साही र गंगा शर्माको जोडी तथा नेपाली आर्मीका अभिनव आचार्य र ईरा एम रावतको जोडी तेस्रो हुँदै कास्य पदक पाएका छन्।
शनिबार नै भएको मेन्स डबल्सतर्फको पहिलो सेमिफाइनलमा गण्डकी प्रदेशका प्रदिप खड्का र नवीन मगरको जोडीले गण्डकीकै धर्म लामिछाने र अनिल साईको जोडीलाई ६–३, ६–३ को सेटमा पराजित गर्दै फाइनलमा स्थान पक्का गरेका हुन्।
यसैगरी दोस्रो सेमिफाइनलमा एपीएफका आइभर लिसानोबिच र जितेन्द्र परियारको जोडीले एपीएफकै छेवाङ लामा र सन्तोष खत्रीको जोडीलाई ६–२, ६–२ को सेटमा पराजित गर्दै फाइनलमा भिडन्त पक्का गरे।
महिला डबल्सतर्फ एपीएफकी सलोनी तामाङ र अस्लेशा लिसानोबिचको जोडीले अभिलाषा विष्ट र ईरा रावतको जोडीलाई ६–४, ६–१ को सेटमा पराजित गर्दै फाइनलमा प्रवेश गरेका छन्। दोस्रो सेमिफाइनलमा प्रेरणा कोइराला र एनि माथेमाको जोडीले श्रीया भट्टराई र रोमिता बुद्धाचार्यको जोडीलाई ६–०, ६–० को सेटमा पराजित गर्दै फाइनलमा प्रवेश गरेका हुन्।
प्रतिक्रिया दिनुहोस !
