काठमाडौं : नेपालले मलेसियामा जारी यू–१९ विश्वकप छनोटअन्तर्गत आफ्नो दोस्रो खेलमा पराजय बेहोरेको छ । शनिबार भएको खेलमा नेपाल संयुक्त अरब ईमिरेट्स (यूएई) सँग डकवर्थ लेविस नियमका आधारमा एक रनले पराजित भएको हो । यो पराजयसँगै नेपाललाई विश्वकप छनोट मुस्किल बनेको छ ।
अर्काे वर्ष दक्षिण अफ्रिकामा हुने विश्वकपको सहभागीता निश्चित गर्न नेपाललाई प्रतियोगितामा अव बाँकि रहेको आफ्नो सबै खेलमा जित हात पारेर मात्रै पुग्ने छैन । यूएईले कम्तिमा एक खेल गुमाउँनु पर्ने छ र त्यसमा नेट रन रेटमा समेत नेपालले उछिन्नु पर्ने छ । अन्तर्राष्ट्रिय क्रिकेट काउन्सिल (आईसीसी) ले सिंगल राउन्ड रोबिन प्रणालीमा हुने प्रतियोगिताको शीर्ष स्थानमा रहने एक टोली मात्रै सिधै दक्षिण अफ्रिका विश्वकपका लागि छनोट हुने प्राबधान बनाएको छ ।
मलेसियाको किन्रारा एकेडेमी ओभलमा टस हारी पहिले ब्याटिङ गरेको नेपालले निर्धारीत ५० ओभरमा सबै विकेट गुमाउँनु अघि दुई सय ४७ रनको योगफल तय गरेको थियो । जवाफी ब्याटिङमा आएको यूएईले ३० ओभरमा तीन विकेट गुमाएर एक सय २२ रन बनाएको अवस्थामा बर्षा भएपछि खेल रोकिएको थियो । खेल फेरी सुरु हुन नसक्दा यूएई डकवर्थ लेविस नियममा भाग्यमानी ठहरीयो ।
प्रतियोगितामा दुई खेलबाट दुई जित नै हात पारेको यूएईको चार अंक भएको छ । दुई खेलमा एक हार बेहोरेको नेपालको मात्र दुई अंक छ । नेपालका लागि हरी बहादुर चौहानले अबिजित ६७ तथा भीम सार्कीले ५३ रनको महत्वपूर्ण योगदान गरेका थिए । यी दुई खेलाडीले छैटो विकेटका लागि ९२ रनको साझेदारी गरेका थिए । त्यस अघि ठूला सट् प्रहार गर्ने प्रयासमा प्रारम्भिक खेलाडीहरूले नियमित विकेट गुमाउँदा नेपाल समस्यामा देखिएको थियो । प्रारम्भिक ब्याट्सम्यान रीत गौतमले ४४ रन जोड्दा आशिफ शेख २७, कप्तान रोहित कुमार पौडेल १८ र पवन सर्राफ १२ रनमा आउट हुन पुगेका थिए ।
यूएईका लागि अन्स टन्डोन (५४) र भृत्य अर्भिन्द (४७) ले तेस्रो विकेटका लागि एक सय एक रनको सतकीय साझेदारी गर्दा डकवर्थ लेविस नियमका आधारमा टोलीको जित निश्चित बनेको थियो । बलिङतर्फ यूएईका रीशव मुखर्जीले नेपालको चार विकेट लिएका थिए ।
प्रतिक्रिया दिनुहोस !
