ती मजदुरलाई अझै थाहा छैन, नरेन्द्र मोदीले उनीहरुको खुट्टा किन धोएका थिए !
वैशाख ४, २०७६ बुधबार १७:५४:०
काठमाडाैं : भारतीय प्रधानमन्त्री नरेन्द्र मोदीले कुम्भ मेलाको मौका छोपी केही विपन्न दलित मजदुरहरुको खुट्टा धोएको समाचार त्यसबेला भाइरल नै बनेको थियो ।
मोदीले खासमा चुनावकै आधार बनाउन यसो गरेको थिए भन्ने टिप्पणी भारतीय मिडियाको थियो । दलित मजदुरहरुको खुट्टा धोएको त्यस घटनाको रोचक रहस्य भने अहिले खुलेको छ ।
तिनै मजदुरहरु प्रधानमन्त्री मोदीलाई सोध्दैछन्, ‘किन धोए हाम्रो खुट्टा ?’ अचम्म त के भने, प्रधानमन्त्री मोदीले खुट्टा धुँदैछन् भन्ने ती मजदुरहरुलाई पूर्व जानकारी नै थिए ।
उनीहरु आफैँ अहिले पनि किन खुट्टा धोए भनेर त्यसको जवाफ पाइरहेका छैनन् । ‘२४ तारिख ४ बजे उनले हामीलाई भेटे,’ एक बृद्धले भने । अर्की महिला भन्छिन्, ‘हामीलाई त लागेको थियो, केही बातचित होला । तर अचानक प्रधानमन्त्री आएर हाम्रा मैला खुट्टा पो धुन थाले !’ यस्तैमा अर्का युवक भन्छन्, ‘हामीलाई त लाज नै लागेको थियो ।’
उनीहरुलाई भित्र बोलाइएको थियो । जहाँ उनीहरु गएर बसे । तर थाहा थिएन कि, किन बोलाइयो भनेर । त्यहाँ पाँचवटा प्लेट देखेर उनीहरु अचम्भित भएको उनीहरु सुनाउँछन् ।
एक बृद्ध महिलाले आक्रोशित हुँदै थपिन्, ‘मोदीजीले खुट्टा धोएर कोही पवित्र भएन ! ३–४ महिनादेखि तलब पाएका छैनौँ हामीले । हामीसँग कुनै जागिर छैन । ठेकेदारीमा काम गरिरहनुपरेको छ । मोदीजी अहिले यहाँ आउन् त हामी उनलाई साबुनले नुहाइदिन्छौँ । कपालमा तेल लगाइदिन्छौँ । तर के यसबाट जागिर मिल्छ त ?’
यसबारे ‘द वायर’ले हालै विस्तृतमा एक भिडियो डकुमेन्ट्री नै तयार पारेको छ । लोकसभा चुनावको माहोलमा कांग्रेसका अध्यक्ष राहुल गान्धी सहित विपक्षी दलका नेताहरुले भने उक्त भिडियोलाई प्रचार सामग्री जस्तै बनाउन थालेका छन् ।
मेलामा खुट्टा धोइएका मजदुरहरुबारे ‘द वायर’ को उक्त भिडियोबाट प्रधानमन्त्री मोदीले त्यसो गरेर चुनावी ‘स्टन्टवाजी’ गरेको प्रष्ट बुझिन्छ । भिडियोमा ती मजदुरले आफू ठेकेदारी प्रथाबाट काम गर्नुपरेको पीडा सुनाउँछन् । जागिर समेत नरहेको अवस्थामा खुट्टा धुँदैमा केही फरक नपर्ने भन्दै आक्रोशित छन् । साथै उनीहरु मोदीलाई भेटेर आफ्नो समस्या सुनाउन चाहेको कुरा पनि भिडियोमा उल्लेख छ । तीमध्ये एक युवकले भनेका छन्, ‘हाम्रो खुट्टा नधोऊ, बरु हाम्रो पेट हेर, हाम्रो भविष्य हेर !’
प्रतिक्रिया दिनुहोस !
