कोलम्बो : श्रीलंकामा भएको शृंखलाबद्ध विस्फोटमा सयौँको मृत्यु भएपछि संकटकालको घोषणा गरिएको छ ।
राष्ट्रपति मैत्रिपाला सिरिसेनाको कार्यालयले सोमवार रातिदेखि लागू हुनेगरी संकटकाल लागू हुने घोषणा गरेको हो । श्रीलंकामा आइतवार भएका विस्फोटनका घटनामा झण्डै २९० जनाको मृत्यु भएपछि स्थिति नियन्त्रणमा लिन संकटकालको घोषणा गरिएको हो । राष्ट्रपति कार्यालयले नागरिकको सुरक्षा सुनिश्चितताका लागि संकटकाल घोषणा गर्नुपरेको उल्लेख छ । राष्ट्रपति सिरिसेनाले मंगलवार राष्ट्रिय शोक मनाउने घोषणा पनि गरेका छन् । बौद्धमार्गी बहुल श्रीलंकामा करिब ६ प्रतिशत क्याथोलिक सम्प्रदायका मानिस छन् । गिर्जाघरमा विस्फोट हुँदा इसाई धर्मावलम्बी इस्टर पर्वका अवसरमा आयोजित धार्मिक कार्यक्रममा सहभागी भइरहेका थिए ।
राजधानी कोलम्बोमा रहेका तीनवटा पाँचतारे होटल र दुई वटा गिर्जाघर (चर्च)मा शृंखलाबद्ध विस्फोट भएका थिए । आक्रमणबाट पाँच सयभन्दा बढी घाइते भएका छन् भने केहीको अवस्था गम्भीर रहेकाले मृत्यु हुनेको सङख्या बढ्न सक्ने बताइएको छ । श्रीलंकाली सुरक्षानिकायले घटनाका दोषीको खोजी गर्न व्यापकरूपमा सुरक्षाकर्मी परिचालन गरेका छन् । प्रहरीका अनुसार विस्फोटनमा संलग्न भएको आशंकामा अहिलेसम्म २४ जनालाई पक्राउ गरिएको छ । प्रहरीले घटनामा संलग्न रहेको आशंकामा २४ जनालाई पक्राउ गरेको छ । शोकमा डुबेको श्रीलंकामा एक दशकपछि भएको यस्तो शक्तिशाली विस्फोटमा संलग्न रहेकाहरूको बारेमा जानकारी सार्वजनिक गरेको छैन । कुनै पनि समूहले घटनाको जिम्मेवारी लिएका छैनन् ।
स्वास्थ्यमन्त्री रजिथा सेनारत्नेले स्थानीय अतिवादी इस्लामिक समूह राष्ट्रिय तौहिद जमात यस विस्फोटनमा जिम्मेवार रहेको बताएका छन् । उनले घटनाबारे अनुसन्धान भइरहेको र अन्तर्राष्ट्रिय समूहको पनि संलग्नता रहेको हुनसक्ने आशंका व्यक्त गरे ।
घटनामा भारतीय, अमेरिकी, बेलायती, जापानी समेतका ३७ जना विदेशी नागरिक पनि रहेको श्रीलंकाको विदेश मन्त्रालयले जनाएको छ । कोलम्बोस्थित सेन्ट एन्थोनी चर्च र राजधानी नजिकको नेगोम्बोस्थित सेन्ट सेबास्टियन चर्चमा विस्फोट गराइएका थिए । यस्तै राजधानीका पाँचतारे होटल सांग्रिला, सिनमन ग्रान्ड र किङ्सबरीमा पनि विस्फोट भएका थिए । सुरक्षाकर्मीहरूले राजधानीस्थित बसपार्कबाट सोमबार साना ठूला गरी ८७ ओटा विस्फोटक पदार्थ फेला परेको जनाएका छन् ।
श्रीलंकाली प्रधानमन्त्री रण्निल विक्रमासिंघेले आक्रमणको पूर्वसूचना पाएर पनि सुरक्षानिकायले पर्याप्त सतर्कता अपनाउन नसकेकामा सुरक्षानिकायको आलोचना गरेका छन् । यद्यपि उनले अहिले सरकारको पहिलो दायित्व मृतक र घाइतेको उचित व्यवस्थापन तथा शान्ति सुरक्षाको प्रबन्ध रहेको बताए ।
प्रतिक्रिया दिनुहोस !
