बलिउडका भिलेनले भोट मागे कन्हैया कुमारलाई, ‘उनलाई जनताको दर्द थाहा छ’

नयाँदिल्ली : भारतको लोकसभा चुनावमा अत्याधिक चर्चामा रहेका उम्मेदवार कन्हैया कुमारको पक्षमा थुप्रै कलाकार र युवाहरु खुलेरै लागेका छन् । थुप्रै सेलिब्रिटी र युवाहरु स्वस्फुर्त रुपमा कन्हैयाको चुनावी क्षेत्र बिहारको बेगुसराय पुगेका छन् ।

यस्तैमा बलिउडमा प्रभावशाली ‘भिलेन’को भुमिकामा अभिनय गर्ने अभिनेता प्रकाश राज पनि बेगुसराय पुगेर कन्हैया कुमारको पक्षमा खुलेर मत मागे । जब कि, प्रकाश राज आफैँ बैंग्लोर केन्द्रका उम्मेद्वार हुन् ।

उनले यस क्रममा आक्रोशित हुँदै बिजेपीको विपक्षमा र कन्हैया कुमारको पक्षमा आफ्नो धारणा राखेका छन् । हालै एबिपी न्युजले प्रकाशसँग लिएको अन्तरवार्ता भाइरल नै बनेको छ । जहाँ उनले कन्हैयाले ढुक्कसाथ जित्ने विश्वास व्यक्त गरे ।

उनले यो चुनावलाई ‘कुपुत्र’ र ‘सुपुत्र’बीच भिडन्तको रुपमा पनि व्याख्या गरे । जहाँ कन्हैयालाई उनले सुपुत्रको रुपमा चित्रित गरेका छन् । तर कुपुत्रको बारेमा नाम भन्न जरुरी नरहेको भन्दै प्रधानमन्त्री नरेन्द्र मोदीलाई लक्षित गरेका थिए ।

अहिले जनतालाई वैकल्पिक पात्र चाहिएको भन्दै कन्हैया त्यस्तै वैकल्पिक पात्र भएको उनको तर्क छ । साथै कन्हैयालाई जनताको दर्द र पीडा थाहा भएकाले उनले नै जित्नुपर्ने प्रकाशले बताएका छन् ।

कन्हैयाले जनताका आवस्यकताका कुरा गरिराख्दा मोदीले भने जात र धर्मको कुरा गरिराखेको भन्दै कन्हैयाकै पक्षमा लाग्न सबैलाई उनले आग्रह पनि गरे । ‘उनीहरुलाई सय पटक झुट बोल्न देऊ, हामी हजार पटक सत्य बोल्छौँ,’ उनले भने, ‘मोदीको विपक्षमा बोल्दा देशद्रोही, एन्टि हिन्दु बनिन्छ ? चुनावमा कोही नेता वा पार्टी हार्दैन, जनताले सही व्यक्ति चुने भने जनता जित्छन् । जनताले गलत व्यक्तिलाई चुने भने जनताले नै हार्छन् ।’