काठमाडौं : इन्डियन प्रिमियर लिग(आईपीएल)मा मंगलबार रातिको खेलमा चेन्नई सुपर किंग्सले सनराइजर्स हैदराबादलाई ६ विकेटले हराएको छ । आफ्नै मैदानमा भएको खेलमा जित हात पार्दै चेन्नई पुनः अंक तालिकाको शीर्ष स्थानमा उक्लिएको छ
चेन्नईले टस जितेर फिल्डिङ रोजेपछि पहिले ब्याटिङमा उत्रिएको हैदराबादले २० ओभरमा ३ विकेट गुमाएर १७५ रन बनाएको थियो । १७६ रनको लक्ष्य चेन्नईले १९.५ ओभरमा ४ विकेट गुमाएर पूरा गर्यो । चेन्नईको जितका लागि अस्ट्रेलियन अलराउण्डर शेन वाट्सन नायक बने । उनले ५३ बलको सामना गर्दा ६ छक्का र ९ चौकासहित ९६ रन बनाए ।
दोस्रो ओभरमै ओपनर जोनी ब्रेस्टोलाई शून्य रनमै गुमाएको हैदराबादका लागि डेभिड वार्नर र मनिष पाण्डेयले आक्रामक ब्याटिङ गरी टेलीलाई उच्च स्कोरतर्फ अग्रसर गराएका थिए । ५ रन बनाउँदा पहिलो विकेट गुमाएको हैदराबादलाई १३.२ ओभरमा १२० रनको अवस्थामा पुर्याएका थिए ।
चौधौं ओभरको तेस्रो बलमा वार्नर आउट भएपछि हैदराबादको रन बन्ने गति सुस्त भयो । पछिल्ला ओभरमा अपेक्षित रन नबन्दा हैदराबादले उच्च स्कोर खडा गर्न सकेन । वार्नर ५४ रन बनाएर आउट हुँदा मनिष पाण्डेय ४९ बलमा ८३ रन बनाएर अविजित रहे ।
चेन्नईका ओपनरलाई सुरुका केही ओभरमा हैदराबादका बलरले चल्न दिएका थिएनन्। २.३ ओभरमा ३ रन मात्रै बनाएको अवस्थामा ओपनर डुप्लेसीको विकेट गुमिसकेको थियो । अर्का ओपनर शेन वाट्सन आक्रमकरुपमा प्रस्तुत भएपछि चेन्नईको सहज जित सम्भव भएको हो । सुरुका खेलमा राम्रो ब्याटिङ गरेको वाट्सन पछिल्ला खेलमा चल्न सकेका थिएनन् । वाट्सनपछि सुरेश रैनाले ३८, अम्बाती रायुडुले २१ र केदार जादवले ११ रन बनाए ।
११ खेल खेल्दा ८ मा जित निकालेको चेन्नई दिल्लीलाई पछि पार्दै पुनः शीर्ष स्थानमा उक्लिएको छ । दिल्लीको शीर्ष स्थान एकदिनभन्दा बढी टिकेन सोमबार राजस्थानलाई हराउँदै दिल्ली शीर्ष स्थानमा उक्लिएको थियो । दिल्लीको १४ अंक छ ।
प्रतिक्रिया दिनुहोस !
