सुर्खेत : सुर्खेतमा जारी वाईवाई कर्णाली प्रिमियर लिग–२ मा कर्णाली ११ ले दोस्रो जित निकालेको छ । उद्घाटन खेलमा झापाको लालीगुराँसलाई पराजित गरी जितको सुरुवात गरेको कर्णालीले शनिबार मध्यपश्चिम क्रिकेट क्लब कोहलपुरलाई३१ रनले हराउँदै दोस्रो जित दर्ता गरेको हो । दास्रो जित निकालेसँगै कर्णाली ११ ले सेमिफाइनलको यात्रा बलियो बनाएको छ ।
टस जितेर ब्याटिङ गरेको कर्णाली–११ ले २० ओभरमा ४ विकेट गुमाए १४८ रनको योगफल तयार गरको थियो । १४९ रनको लक्ष्य पछ्याउने क्रममा मध्यपश्चिम क्रिकेट क्लबले २० ओभरमा ७ विकेट गुमाएर ११७ रन मात्रै बनाउन सक्यो ।
मध्यपश्चिमलाई लक्ष्यसम्म पुग्न नदिन कर्णाली–११ का लागि कृष्ण कार्कीले सर्वाधिक ३ विकेट लिए भने किशोर महतोले २ विकेट लिए । कृष्णले ४ ओभरमा एक मेडन ओभरसहित ११ रन मात्र खर्चिए । जितेंर सिंह ठकुरी र ललित प्याकुरेलले १–१ विकेट लिए ।
मध्यपश्चिमका लागि शैलेन्द्र यादवले सवार्धिक ३१ रन बनाए । त्यसै गरी राजबिर सिंहले ३० तथा आकाश विष्टले २३ रन बनाए पनि जितको लागि पर्याप्त रहेन । ‘प्लेयर अफ द म्याच’ कृष्ण कार्की चुनिए ।
पहिले ब्याटिङ गरेको कर्णाली–११ का लागि कप्तान रविन्द्रजंग शाहीले अविजित ६१ रन जोडे । यू–१९ राष्ट्रिय टेलीबाट खेलिसकेका शाहीले ५६ बलमा ६ चौका प्रहार गरे । यस्तै कृष्ण कार्कीले आक्रामक इनिङ खेल्दै २७ बलमा अविजित ४६ रन बनाए कार्कीले ४ चौका र २ छक्का प्रहार गरे । लोकेस बमले १७ रनको योगफल दिए ।
७९ रनमा चौथो विकेट गुमेपछि रविन्द्र र कृष्णले पाँचौ विकेटका लागि ६९ रनको साझेदारी गरी टोलीको स्कोर उकासेका थिए । मध्यपश्चिमका लागि तुल्सीराम अहिनले २ विकेट तथा अमित तामाङ र अजय शाहनीले १–१ विकेट लिए ।
प्रतिक्रिया दिनुहोस !
