मह सञ्चारको ब्यानरमा निर्माण भएको फिल्म ‘दाल भात तरकारी’ शुक्रबारबाट देशभर प्रदर्शनमा आउँदै छ । अघिल्लो सफल फिल्म ‘शत्रु गते’ युनिटले निर्माण गरेको फिल्म नयाँ वर्ष २०७६ को प्रतीक्षित फिल्म मध्येको एक हो । यो फिल्म रिलिज हुन लागेको वर्षकै पहिलो ठूलो फिल्म हो ।
किरण केसीको प्रस्तुति रहेको फिल्मले प्रदर्शनपूर्व देशव्यापी कन्सर्ट सम्पन्न गरेको छ । ‘दर्शकसँग प्रत्यक्ष रूपमा फिल्मबारे जानकारी गराउने उद्देश्यले कन्सर्ट गरिएको हो’, किरणले भने, ‘हामीले दर्शकलाई फिल्म हेर्न निम्तो दिएर फिर्किएका छौं ।’ किरण पुत्र सुदन केसीले फिल्मको निर्देशन गरेका छन् ।
यो फिल्मको कथा, पटकथा तथा संवाद हरिवंश आचार्यले लेखेका हुन् । हरिवंश आचार्य, शिवहरि पौडेल, पल शाह, आँचल शर्मा, निरुता सिंह, वर्षा राउत, राजाराम पौडेल, प्रियंका कार्की, विल्सनविक्रम राई, यमन श्रेष्ठ लगायतका कलाकारको फिल्ममा अभिनय छ ।
मित्र डी. गुरुङको सम्पादन रहेको फिल्म दीर्घ गुरुङले खिचेका हुन् । यसमा प्रमिला आचार्य, यमन श्रेष्ठ, शिवहरि पौडेललगायत निर्मातामा छन् ।
तुलनात्मक रूपमा घोषणा गरेको दिनबाटै चर्चामा रहेको चलचित्र ‘दाल भात तरकारी’को गीत ‘भिजिट भिसामा’ले युट्युबमा ५८ दिनसम्म आइपुग्दा एक करोड ५७ लाख भ्यु पाइसकेको छ । साथै ‘टिकटक’मा समेत उक्त गीत अहिलेसम्मकै हिट देखिएको छ ।
प्रतिक्रिया दिनुहोस !
