हेटौंडा : मकवानपुरको प्रमुख पर्यटकीय गन्तव्य इन्द्रसरोवर गाउँपालिकामा प्याराग्लाइडिङको सफल परीक्षण गरिएको छ। इन्द्रसरोवर गाउँपालिका- १ मार्खुस्थित कुलेखानी जलविद्युत् आयोजनाको ताल इन्द्रसरोवरमाथि गुम्बा डाँडाबाट प्याराग्लाइडिङका सफल परीक्षण गरिएको हो।
पर्यटन प्रवर्धनका लागि गाउँपालिकाको पहलमा नियमित उडान गर्ने लक्ष्यका साथ परीक्षण उडान गरेको गाउँपालिका अध्यक्ष जीवन लामाले बताए। प्याराग्लाइडिङ परीक्षणका लागि गाउँपालिकाले पोखराबाट प्याराग्लाइडिङ पाइलट विशाल लामाको नेतृत्वमा अध्ययन तथा परीक्षण गराएको थियो।
परीक्षण उडानसँगै प्याराग्लाइडिङ उडानको लागि आवश्यक अनुमति लिने प्रक्रिया अघि बढाइएको अध्यक्ष लामाले बताए । ‘नागरिक उड्यन प्राधिकरणले अनुमति दिने वित्तिकै हामी व्यावसायिक उडान थाल्छौं',उनले भने, 'यस क्षेत्रको पर्यटन प्रवर्द्धनमा यसले महत्वपूर्ण सहयोग गर्नेछ भन्ने अपेक्षा लिएका छौं।'
राजधानी काठमाडौंबाट नजिक रहेको कुलेखानी, मार्खु र चित्लाङ क्षेत्रमा वर्षेनी पर्यटक करिब ५० हजार पर्यटक आउने गरेको अध्यक्ष लामाले बताए। 'हामीसँग प्राकृतिक सुन्दरता र हावापानीको कमी छैन, त्यसमा आवश्यक पूर्वाधार थपेर वार्षिक एक लाख बढी पर्यटक भित्र्याउने लक्ष्यका साथ काम गरिरहेका छौं,'उनले भने।
प्रतिक्रिया दिनुहोस !
