लन्डन : इङ्लिस प्रिमियर लिग फुटबल प्रतियोगिताको उपाधि म्यानचेस्टर सिटीले जितेको छ । म्यानचेस्टर सिटीले आइतबार राति खेलिएको आफ्नो अन्तिम खेलमा तुलनात्मक रुपमा कमजोर प्रतिद्वन्द्वी ब्राइटनलाई उसैको मैदानमा ४—१ गोलले हरायो ।
उक्त जितसँगै म्यानचेस्टर सिटी प्रिमियर लिगको उपाधि जोगाउन सफल भयो । म्यानचेस्टर सिटी सन् २००९ पछि लगातार दुईपटक उपाधि जित्ने पहिलो टोली हो । उपाधि जोगाउन म्यानचेस्टर सिटीले अन्तिम खेल जित्नै पर्ने दबाब थियो ।
उपाधिको होडमा रहेको लिभरपुलले पनि अन्तिम खेलमा जित हात पा¥यो । तर, म्यानचेस्टर सिटीको जितसँगै लिभरपुलको उपाधि सपना चकनाचुर बन्न पुग्यो । लिभरपुलले आफ्नो अन्तिम खेलमा घरेलु मैदानको फाइदा उठाउँदै उल्भरह्याम्पटनलाई २—० गोलले हरायो । खेल सुरु भएको २७औं मिनेटमा पहिलो गोल खाएको म्यानचेस्टर सिटीले त्यसपछि खेलमा उत्कृष्ट पुनरागमन गरेको थियो । ब्राइटनका लागि ग्लेन मुरेले पहिलो गोल गरेका थिए ।
म्यानचेस्टर सिटीका लागि २८औं मिनेटमा सर्जियो एग्वेरोले जवाफी गोल गरे । ३८औं मिनेटमा आयमेरिक लापोर्टले म्यानचेस्टर सिटीको अग्रता दोब्बर बनाए । ६३औं मिनेटमा रियाद माहरेजले तेस्रो गोल गरे भने ७२औं मिनेटमा ईकी गुन्डोगनले चौथो गोल थपेका थिए । अर्को खेलमा लिभरपुलका लागि भने दुवै गोल साडियो मानेले गरेका थिए ।
अन्तिम चरणको खेलको समाप्तिपछि म्यानचेस्टर सिटी (९८ अंक) पहिलो, लिभरपुल (९७ अंक) दोस्रो, चेल्सी (७२ अंक) तेस्रो र टोट्टनहाम (७१ अंक) चौथो हुँदै आगामी सिजनको च्याम्पियन्स लिगमा छनोट भए । पाँचौं भएको आर्सनल (७० अंक) र छैटौं भएको म्यानचेस्टर युनाइटेड (६६ अंक) भने आगामी सिजनको युरोपा लिगका लागि छनोट भए । कार्डिफ सिटी, फुलहाम र हडर्सफिल्ड टाउन रेलिगेसनमा परेर तल्लो डिभिजनमा घटुवा भए ।
अन्तिम चरणको खेलमा आर्सनलले बर्नलीलाई उसैको मैदानमा ३—१ ले हरायो भने चेल्सीलाई लेस्टर सिटीले गोलरहित बराबरीमा रोक्यो । म्यानचेस्टर युनाइटेड भने कार्डिफ सिटीसँग उसैको मैदानमा २—० गोलले पराजित भयो । टोट्टनहाम भने घरेलु मैदानमा एभर्टनसँग २—२ गोलको बराबरीमा रोकियो ।
प्रतिक्रिया दिनुहोस !
