कर्मचारी नहुँदा हैरान : स्थानीय प्रतिनिधि भन्छन्, ‘कर्मचारी खोज्दै बित्यो दुई वर्ष’
जेठ १, २०७६ बुधबार १४:४१:०
बैतडी : बैतडीका अधिकांश स्थानीय तहका विषयगत शाखाहरु कर्मचारी अभावमा नाम मात्रैका शाखा भएका छन् । विषयगत शाखा मार्फत हुने काम समयमै नहुँदा सेवाग्राही पनि हैरान हुने गरेका छन् ।
मणिलेक मावि काँडा मेलौलीका प्रधानाध्यापक देवदत्त कलौनीका अनुसार गत वर्षको छात्रवृत्तिको रकम अहिलेसम्म वितरण गर्न सकिएको छैन । पाठ्यपुस्तक वापत रकम पनि नगरपालिकाबाट निकासा भएको छैन ।
उनी भन्छन्, ‘नगरपालिकाको शिक्षा शाखामा शिक्षाका अधिकृत स्तरका कर्मचारी हुने भन्ने व्यवस्था छ । तर, अहिलेसम्म श्रोत व्यक्तिहरुले शाखा सञ्चालन गरिरहेका छन् । माध्यमिक तह सम्मको शिक्षा हेर्ने अधिकार स्थानीय तहलाई दिएको भए पनि स्थानीय तहमा कर्मचारी नै नहुँदा समस्या छ ।’
जिल्लाका १० ओटै स्थानीय तहका शिक्षा शाखा हेर्ने जिम्मेवारी श्रोत व्यक्तिहरुलाई दिइएको छ । स्थानीय तहहरुलाई शिक्षाको अधिकार दिएपछि सजिलो हुनुको सट्टा कर्मचारीको अभावमा काम नै रोकिन थालेको छ ।
जिल्लाको दुर्गम गाउँपालिकाको रुपमा रहेको सिगास गाउँपालिकामा पनि विषयगत शाखामा कर्मचारी छैनन् । शाखाहरुमा कर्मचारी नहुँदा कामकाजमा बाधा परिरहेको प्रमुख प्रशासकीय अधिकृत रघुनाथ अवस्थी बताउँछन् । उनका अनुसार गाउँपालिकामा जम्मा तीन जना कर्मचारी छन् । विषयगत शाखामा मात्रै होइन वडा समेत सचिव छैनन् ।
विषयगत शाखामा कर्मचारी नहुँदा सोचे अनुसार काम गर्न नसकिएको प्रमुख प्रशासकीय अधिकृत अवस्थीको गुनासो छ । जसकारण विभिन्न फाँटका काम समेत बाँडफाँड गर्न नसकिने कर्मचारीहरु बताउँछन् ।
कर्मचारी अभावका कारण शिक्षा, कृषि, स्वास्थ्य लगायत क्षेत्रका कामहरु नै बढी प्रभावित हुने गरेको सूर्नया गाउँपालिकाका अध्यक्ष बीरबहादुर बिष्टले बताए । कर्मचारी अभावबाट नियमित सेवा नै प्रभावित भएपछि स्थानीयको पनि गुनासो बढ्न थालेको छ । मेलौलीका स्थानीय केशवसिंह भाट भन्छन्, ‘स्थानीय तहबाट सबै सेवा पाइन्छ भनेर खुसी भएका थियौँ । तर नगरपालिकामा कर्मचारी नै छैनन् । भने अनुसार काम नै हुँदैन । कर्मचारी विनाका स्थानीय तहहरुले के गर्नु ?’
त्यसो त, नगरपालिकाले नीति, रणनीति कार्यान्वयनमा समेत समस्या आउने गरेको मेलौली नगरपालिकाका प्रमुख कृष्णसिंह नायक बताउँछन् । नायक भन्छन्, ‘विषयगत शाखा मात्रै नभएर कहिले प्रमुख प्रशासकीय अधिकृत खोज्नुपर्छ । कहिले लेखापाल खोज्नुपर्छ । कर्मचारी खोजखाजमै दुई वर्ष बित्न थाल्यो ।’
लेखापाल पनि छैनन्
जिल्लाको मेलौली नगरपालिकाका हरेक वडामा विकास निर्माणका कामहरु लगभग सकिएका छन् । तर लेखापाल नहुँदा भुक्तानी हुन सकेको छैन ।
‘वडामा सम्पन्न भएका कामको भुक्तानी कहिले हुन्छ भनेर स्थानीयले सोधेका सोध्यै छन् । तर नगरपालिकामा कहिले लेखापाल हुँदैनन् कहिले प्रमुख प्रशासकीय अधिकृत हुँदैनन् ।
मेलौली नगरपालिका–३ का वडाध्यक्ष रघुवीरसिंह भाटका अनुसार लेखापाल नहुँदा सबै काम रोकिएको छ । पुरचौंडी नगरपालिकाको पनि उस्तै हालत छ । जहाँ लेखापाल नभएकै कारण भुक्तानी रोकिएको छ ।
प्रतिक्रिया दिनुहोस !
