गहुँको भुसमा लाएको आगो उडाएर ६ घरमा आगलागी

अछाम : ढकारी गाउँपालिका वडा नम्बर ४ बलातामा आगलागी हुँदा ६ घर जलेर नष्ट भएका छन् । शुक्रबार बेलुका गहुँको भुस पोल्न लगाइएको आगो हावाहुरीले उडाएपछि आगोले घर र गोठ जलेर नष्ट भएको प्रहरीले जनाएको छ । 

    
बलाताका वडा अध्यक्ष भक्तबहादुर बुढाको घरगोठ जलेर क्षति पुगेको छ भने मिनबहादुर बुढाको घरगोठ पूर्ण रुपमा जली गोठमा बाँधेका ५ वटा बोका, ३० वटा बाख्रा, ५ वटा खसी, १५ वटा बाख्राका पाठा, एक गोरु र निर्प साउँदको ५ वटा बाख्रा जलेर नष्ट भएका छन् । 
त्यसैगरी ईन्द्रबहादुर बुढा, जोगीबहादुर बुढा र रामबहादुर बुढाको घर पूर्ण रुपमा जलेको प्रहरीले जानकारी दिएको छ । 
    
साँझ करिब ८ बजेतिर लागेको आगो राती ११ बजे प्रहरीको टोली र स्थानीय बासिन्दाको सक्रियतामा नियन्त्रणमा आएको हो ।