‘मन्त्रालयको आदेश भन्दै काम नगर्ने कर्मचारीसँग प्रतिनिधिको मनमुटाब’

काठमाडौं : गाउँपालिका राष्ट्रिय महासंघका अध्यक्ष होमनारायण श्रेष्ठले मन्त्रालयको आदेश भन्दै काम नगर्ने कर्मचारीसँग जनप्रतिनिधिको मनमुटाब भएको टिप्पणी गरेका छन् ।

नियतभन्दा पनि बुझाइका कारण मनमुटाब हुँदा जनप्रतिनिधि र कर्मचारीबीच द्वन्द्व हुने गरेको उनको भनाइ छ । गाउँपालिका राष्ट्रिय महासंघ नेपाल र विकास पत्रकार मञ्च (फोडेज) नेपालले सोमबार राजधानीमा आयोजना गरेको ‘चालु आर्थिक वर्षको सिकाइ, आगामी आर्थिक वर्षको सोचाइ’ विषयक कार्यक्रममा महासंघका अध्यक्ष श्रेष्ठले यस्तो बताएका हुन् ।

‘स्थानीय सरकारले काम गरेनन् भन्नुभन्दा थोरै जनशक्ति, भौतिक पूर्वाधारको अभाव र समस्याहरुका बीचमा यत्तिका काम गाउँपालिकाले गरे भन्नु जायज होला, गाउँपालिकालाई सिंहदरबारसँग तुलना गरेर हुँदैन,’ श्रेष्ठले भनेका छन् ।

महासंघका कोषाध्यक्ष वंशलाल तामाङले पनि गाउँपालिकाहरुले काम गर्न नसकेकोभन्दा परिणाम देखिन बाँकी रहेको बताए । एउटा गाउँपालिका वा त्यहाँको कर्मचारी÷जनप्रतिनिधिले गरेको बिगारमा ७५३ स्थानीय सरकारलाई मुछ्नु दुर्भाग्य भएको उनको भनाइ छ ।

महासंघका वरिष्ठ कार्यक्रम अधिकृत राजेन्द्रप्रसाद प्याकुरेलले करबारेका भ्रम चिर्न गाउँपालिकाहरुलाई समय लागेको बताए । ‘पहिलो वर्ष भएको र विगतको खाडल पुर्नुपर्ने भएका जस्ता कारणले अपेक्षित उपलब्धी हुन नसके पनि भोलिका लागि थुप्रै सिकाइ भएका छन्’, उनले भने ।

फोडेजका अध्यक्ष गोपीकृष्ण ढुंगानाले प्रत्येक गाउँपालिकाले समग्र विकासका अतिरिक्त एउटा ‘फोकस’ कार्यक्रम ल्याउनु पर्ने र त्यसैबाट गाउँपालिका चिनिनुपर्नेमा जोड दिए ।