अव्यवस्थित तारबाट करेन्ट लागेर दुई चालककाे मृत्यु, दुईजना घाइते
जेठ १३, २०७६ सोमबार १९:४०:०
मकवानपुर : उत्तरी मकवानपुरको इन्द्रसरोवर गाउँपलिका–३ सिस्नेरीमा करेन्ट लागेर दुईजनाको मृत्यु भएको छ । अन्य दुईजना घाइते छन् ।
सोमबारको उक्त घटनामा मृत्यु हुने दुबैजना सवारी चालक हुन् । ११ हजार भोल्टेजको करेन्ट लागेको थियो ।
भीमफेदी गाउँपालिकास्थित इपामा रहेको माण्डु हाइड्रोपावरका लागि विद्युतीय सामग्री बोकेर आयोजना स्थलतर्फ जाँदै गरेको ना ७ ख ९३२६ नम्बरको टिलर हाइटेन्सन लाइनमा छुँदा विद्युत् सर्ट भइ करेन्ट लागेको मकवानपुर प्रहरी प्रवक्ता डिएसपी यज्ञप्रसाद भट्टराइले बताए ।
करेन्ट लागेर मृत्यु हुनेमा टिलर चालक नुवाकोट बेलकोटगढी ७ मझुवाका ३५ वर्षीय विशाल तामाङ र जेसिवी चालक सिन्धुली तीनपटन गाउँपालिका आमबोटेका २८ वर्षीय वीरबहादुर मगर रहेको भट्टराईले जानकारी दिए ।
घाइते हुनेमा सिन्धुली तीनपटनका २५ वर्षीय गोपालराम ओली र दाङ घर भइ ललितपुर बस्दैआएका ४५ वर्षीय महेश बस्नेत रहेको बताइएको छ ।
घाइतेहरुलाई उपचारको लागि काठमाडौं पठाइएको मकवानपुर प्रहरीले जनाएको छ ।
सडक छेउमा रहेको विद्युत्को तारमा टिलरले छोएपछि चालक र सहचालक करेन्ट लागेर घाइते भएको र घाइते चालकलाई बचाउन जाँदा जेसिवी चालकलाई समेत करेन्ट लागेर दुबै जनाको मृत्यु भएको मकवानपुर प्रहरी प्रवक्ता डिएसपी भट्टराईले बताए ।
टिलरलाई सडक खाल्डा खुल्डीका कारण सामान लिएर आउन समस्या भएपछि सहायताका लागि जेसिवी पनि साथमै आएको स्थानीय सन्तोष बानियाँले बताए ।
‘केही दिनअघि ट्रिपरले विद्युत्को पोललाई ठोकेपछि पोलको तार अव्यवस्थित अवस्थामा थियो’, उनले भने, ‘सोही तारले टिलरमा रहेको ट्रान्समिटरलाई छुँदा करेन्ट लागेको हो ।’
प्रतिक्रिया दिनुहोस !
