जनकपुरधाम : प्रदेश २ मा रहेका ठुला पुल तथा सडक निर्माणको ठेक्का पाएको पप्पु कन्स्ट्रक्सनले समयमा काम नगर्दा नागरिकले सास्ती झेल्नुपरेको छ । तराई मधेशमा महत्वपूर्ण मानिएको सिरहा र धनुषा जोड्ने हुलाकी राजमार्गअन्तर्गत कमला नदीका साथै महोत्तरीको रातो नदी पुल र दुई वटा सडकको ठेक्का लिएको पप्पुले समयमा काम नसक्दा वर्षायाममा हिलो र सुख्खायाममा धुलोले जनजीवन प्रभावित भएको छ ।
सिरहा र धनुषाको सिमा भएर बग्ने कमलानदी र सिरहा सप्तरीको सिमामा बग्ने बलान नदीको पुल ठेक्का लागेको वर्र्षौ भए पनि अवस्था उस्तै छ । ५५ करोड रुपैयाँभन्दा बढीको लागतमा ४ वर्षभित्र निर्माण पुरा गर्ने शर्तमा ठेक्का लिएको पप्पुले ९ वर्ष बित्दा पनि काम सकेको छैन् । त्यस्तै महोत्तरीमा रामजानकी पथ, लोहारपट्टीदेखि पश्चिम रातु खोलामा पर्ने रातो पुल र जलेश्वर सदरमुकामस्थित खाद्य संस्थानदेखि धिरापुर जाने सडक निर्माण पनि पप्पु कन्स्ट्रक्सनको लापरबाहीका कारण अलपत्र छ ।
जनकपुरधाम कुर्थादेखि लोहारपट्टी हुँदै रौजामजार र बलवा नगरपालिका भएर महोत्तरीको सिमावर्ती सडक सम्सी जोड्ने निर्माणाधीन रातु नदीको पुल निर्माण थालेको पाँच वर्षभन्दा बढी भए पनि पुरा हुन सकेको छैन् । १४ करोड ६४ लाख ७४ हजार रुपैयाँमा ठेक्का सम्झौता गरेको पप्पुले चारवटा पिलर उठाएर काम अत्रपत्र छाडेको छ ।
सडक डिभिजन कार्यालय जनकपुरले २०७१ असार ३१ मा महोत्तरीको लोहारपट्टी–रौजाबीचमा पर्ने रातुखोलामा पुल निर्माण सम्झौता गरी २०७३ पुस ३१ सम्म निर्माण सम्पन्न गर्ने सम्झौता भए पनि हालत उस्तै छ । ठेक्काको म्याद समाप्त भएको तीन वर्ष भए पनि निर्माण अलपत्र छ । सडक डिभिजन कार्यालयका अनुसार पुलमा हालसम्म २३ प्रतिशतमात्रै काम भएको छ । लोहारपट्टी नगरपालिकाका मेयर शैलेन्द्रकुमार यादवले भने ५ प्रतिशत पनि काम नभएको दावी गरेका छन् ।
समयमा निर्माण पुरा नभएकाले खोलामा बाढी आएका बेला स्थानीय लामो घुमाउरो बाटोबाट कष्टकर यात्रा गर्न बाध्य भएको बलवा नगरपालिकाका मेयर बिनोदकुमार यादवले बताए । ‘सामान्य वर्षा हुँदा पनि आवतजावत ठप्प हुने गरेको छ । बिरामीलाई उपचारका लागि अस्पताल लैजान समस्या हुने गरेको छ’, मेयर यादवले भने, ‘पप्पु कन्स्ट्रक्सनले समयमा पुल नबनाएकाले सडक पनि अलपत्रजस्तै भएको छ ।’
रातु र कमलानदीको पुलमात्र होइन, महोत्तरीको प्रमुख सडक रामजानकी पथसमेत चार वर्षदेखि स्तरोन्नती हुन सकेको छैन । जनकपुरधाम–मटिहानी १५ किलोमिटर सडकमध्ये ६ किमी सडक बने पनि उक्त सडक निर्माण नसकिँदै भत्किन थालेको छ । अन्य ६ किमी सडकसमेत जीर्ण अवस्थामा छ । २०७२ असार १३ मा स्तरोन्नति र कालोपत्रे गर्न ९ करोड ४७ लाख रुपैयाँमा ठेक्का लिए पनि कम्पनीले काम पुरा गर्न नसकेपछि पप्पुमार्फत ब्रदर्स कन्स्ट्रक्सनले काम गरिरहेको छ ।
महोत्तरी सदरमुकाम जलेश्वरको खाद्य संस्थानदेखि धिरापुर जाने सडक २०७२ असार ३१ मा ३ करोड ४९ लाख ६८ हजारमा ठेक्का लिएको पप्पुले सम्झौतामा ०७३ असार ३१ मा काम सक्ने सम्झौता छ । तर हाल सम्म सडकमा केही प्रगति देखिएको छैन् । पप्पुले विभिन्न बहाना बनाएर दुई पटकसम्म म्याद थपेको छ । थप म्यादमा समेत काम सकेको छैन । खरिद ऐन नियमानुसार पप्पुले अधिकांस योजना सुरु गरेको देखाएर कुल लागतको २० प्रतिशत रकम झिके पनि भौतिक पूर्वाधार निर्माण अलपत्र पारेको सडक डिभिजन कार्यालयका प्रमुख बिनोद मौवारले बताए ।
प्रतिक्रिया दिनुहोस !
