इङ्ल्याण्ड : क्याराबिन राष्ट्रहरुको क्रिकेट टोली वेस्ट इन्डिज ठूला सट खेल्न माहिर खेलाडीले भरिभराउ मानिन्छ । विषेशगरी टी–ट्वीन्टी फम्र्याटको खेलमा वेस्ट इन्डिजका ब्याट्सम्यानहरु निकै चम्किने गर्छन्। उनीहरुका ब्याटबाट एक दुई रनभन्दा पनि चौका, छक्का धेरै देख्न पाइन्छ । विश्वभरि हुने टी–ट्वीन्टी फ्रेन्चाइज लिगहरुमा वेस्ट इन्डिजका खेलाडीको बाक्लो उपस्थिति देखिन्छ । ११ औं नम्बरमा क्रिजमा आउने ब्याट्सम्यानहरु पनि उत्तिकै दामदार ब्याटिङ गर्ने क्षमता राख्छन् ।
एक दिवसीय क्रिकेटको विश्वकप यही बिहीबारदेखि इङ्ल्याण्ड र वेल्समा सुरु हुँदैछ । विश्वकपअघि मंगलबार न्यूजिल्याण्डविरुद्ध खेलेको अभ्यास खेलमा वेस्ट इन्डिजका ब्याट्सम्यानले आफ्नो आक्रमक ब्याटिङको शक्ति प्रदर्शन गरेका छन् । इङ्ल्याण्डको ब्रिस्टोलस्थित कोन्टी ग्राउन्डमा भएको खेलमा वेस्ट इन्डिजले न्यूजिल्याण्डलाई ९५ रनले पराजित गर्यो । न्यूजिल्याण्डले टस जितेर बलिङ रोजेपछि पहिले ब्याटिङमा उत्रिएको वेस्ट इन्डिजले ४९.२ ओभरमा अलआउट हुँदै ४२१ रन बनायो । न्यूजिल्याण्डले ४७.२ ओभरमा ३३० रन बनाउँदा सबै विकेट गुमायो ।
पाका खेलाडी क्रिस गेलदेखि युवा खेलाडी सबैले राम्रो स्कोर बनाए । ११ खेलाडीमध्ये ९ जनाले २० भन्दामाथिको स्कोर बनाए । एकले शतक र दुईजनाले अर्धशतक बनाए । यस सिजनको आईपीएलमा चम्किएका अलराउन्डर आन्द्रे रसेल यस खेलमा पनि चम्किए । उनले २५ बलमा ५४ रन बनाए । विश्वकपमा पनि आफ्नो ब्याटिङ पावर देखाउने संकेत दिएका छन् ।
विकेटकिपर शाइ होपले ८६ बलमा १०१ रन बनाए । युवा खेलाडी इभिन लेविजले पनि ५० रन बनाए । गेलले भने २२ बलमा ३६ रन बनाए । उनले यसै विश्वकपपछि अन्तराष्ट्रिय क्रिकेटबाट सन्यास घोषणा गरिसकेका छन् ।
वेस्ट इन्डिजका खेलाडीको ब्याटिङ कार्ड
विशाल लक्ष्य पछ्याएको न्युजिल्याण्डले पनि आक्रामक सुरुवात गर्यो । विकेटकिपर टम ब्लन्डेल ८९ बलमा १०६ रन बनाए । कप्तान केन विलियमसनले ६४ बलमा ८५ रन र बलर इश सोधीले १६ बलमा ३९ रन जोड भने अन्यले सामान्य प्रदर्शन गरे । राम्रो ब्याटिङ गरे पनि विशाल लक्ष्य भेट्उन सकेनन् ।
शनिबार भारतसँगको अभ्यास खेलमा भारतलाई जम्मा १७९ रनमा रोकेका न्युजिल्याण्डका बलर वेस्ट इन्डिजका ब्याट्सम्यानसामु निरीह सावित भए । भारतविरुद्ध ४ विकेट लिएका ट्रेन्ट बोल्ट यस खेलमा पनि ४ विकेट लिन सफल भए ।
एकदिवसीय विश्वकपको सुरुवातका दुई संस्करणको उपाधि जितेको वेस्ट इन्डिज यस पटक पनि आफूलाई विश्वकपको प्रबल दावेदारको रुपमा उभ्याएको छ । टी–ट्वीन्टी विश्लकपका ६ संस्करण मध्ये वेस्ट इन्डिजले मात्रै दुई संस्करणको उपाधि जितेको छ ।
बिहीबार विश्पकपको पहिलो खेलमा आयोजक इङ्ल्याण्ड र दक्षिण अफ्रिका भिड्दैछन् ।
प्रतिक्रिया दिनुहोस !
