नुवाकोट : पार्टी एकताको एक वर्षपछि नुवाकोट र रसुवामा नेपाल कम्युनिस्ट पार्टी (नेकपा) पार्टी सदस्यले पद तथा गोपनीयताको शपथ लिएका छन्।
नुवाकोटको विदुर र रसुवाको धुन्चेमा बिहीबार एकैदिन पार्टी पदाधिकारी तथा सदस्यले शपथ ग्रहण गरेका हुन्। फरक-फरक कार्यक्रममा नेकपा स्थायी कमिटी सदस्य तथा प्रदेश ३ इन्चार्ज अष्टलक्ष्मी शाक्यले जिल्ला संयोजक, सचिव तथा सदस्यलाई पद तथा गोपनियताको शपथ गराएकी हुन्।
नुवाकोटमा संयोजक हिरानाथ खतिवडा, सचिव नारायणप्रसाद खतिवडा र छिमेकी रुसुवामा संयोजक कन्र्याल लामा र सचिवमा इन्द्र गौतम जगतजंग रहेका छन्।
शाक्यले नुवाकोटमा खतिवडाद्वयसहित १ सय ४५ जनालाई शपथ गराइन्। संयोजक हिरानाथ खतिवडा प्रदेशसभा सदस्य हुन् भने सचिव नारायणप्रसाद खतिवडा प्रतिनिधि सभा सदस्य हुन्।
नुवाकोटमा पूर्वएमालेबाट ७४ र पूर्वमाओवादीबाट ७१ गरी कुल १ सय ४५ जनाको जिल्ला कमिटी रहेको छ। छिमेकी रसुवामा पूर्वएमालेबाट ६० र पूर्वमाओवादीबाट ४० प्रतिशत गरी कुल १ सय ३५ जनाको जिल्ला कमिटी रहेको छ।
शपथ ग्रहण कार्यक्रममा नेकपाको नयाँ कमिटी सदस्यलाई शुभकामना दिँदै प्रदेश ३ की इन्चार्ज शाक्यले नेकपाको एकताले देशमा छुट्टै तरङ्ग आएको बताइन्।
शपथ कार्यक्रममा नेकपा प्रदेश ३ का सह–इन्चार्ज तथा पूर्वमन्त्री हितबहादुर तामाङले देशमा नेकपाको सरकार र नेकपाविरुद्ध अनेक षडयन्त्र भइरहेका कारण त्यसलाई नियन्त्रण गर्नुपर्ने बताए।
नेकपा प्रदेश ३ का अध्यक्ष नारायण दाहाल, सचिव आनन्दप्रसाद पोख्रेललगायतको उपस्थिति थियो। 
प्रतिक्रिया दिनुहोस !
