प्रदेश-२ का मुख्यमन्त्री राउतको आक्रोश : आयुक्त नै बैमान र फटाहा !
जेठ २१, २०७६ मंगलबार १५:३६:०
जनकपुरधाम : कर्मचारी भर्नाको विषयलाई लिएर प्रदेश २ का मुख्यमन्त्री लालबाबु राउत लोकसेवा आयोगका आयुक्त विरुद्ध आक्रोशित भएका छन् ।
मुख्यमन्त्री राउत आयुक्तलाई ‘बैमान र फटहा’ भन्दै व्यक्तिगत आलोचनामै उत्रिए । जनकपुरमा प्रदेशस्तरीय दलित भेलालाई सम्बोधन गर्दै उनले यस्तो बताएका हुन् ।
समावेशी सिद्धान्तलाई मिचेर लोकसेवा आयोगको प्रदेश र स्थानीय तहका कर्मचारीको भर्नाको सार्वजनिक सूचना अह्वान गरेको भन्दै मुख्यमन्त्री राउतले कडा आपत्ति जनाएका थिए ।
‘मैले खुल्ला रुपमा लोकसेवा आयोगको विरोध गरेको छु । प्रदेश र प्रदेशभित्रका स्थानीय तहमा कर्मचारी पठाउने अधिकार हाम्रो हो,’ उनले भने, ‘संघीय सरकार जहाँ बसेको छ त्यहाँ बैमान, फटहा लोकसेवाको आयुक्त बनेर बसेका छन् । सिर्फ पैसा कमाउन र एउटै जातीको समुदायलाई भर्ना गर्न खोजेको छ ।’
संविधानको धारा २२७ ले प्रदेश र स्थानीय तहमा कर्मचारी भर्ना गर्ने अधिकार प्रदेश सरकारको तर आयोगले समावेसितालाई मिच्न खोजेको भन्दै आपत्ति जनाए । मुख्यमन्त्री राउतले यसको लागि लड्ने, कानुनी उपचार खोज्ने र जरुरी परे सडकमा प्रदर्शन गर्ने पनि चेतावनी दिए । साथै काठमाडौं पुगेरै आन्दोलन गर्ने पनि उनको चेतावनी थियो ।
लोकसेवा आयोगप्रति व्यंग्य गर्दै उसले समावेसिता मिचेर टेलर मात्रै देखाएको तर सरकारले पूरा फिल्म देखाउने भन्दै कडा चेतावनी दिएका थिए ।
प्रतिक्रिया दिनुहोस !
