वीरगन्ज : वीरगन्ज महानगरपालिकाले आगामी आर्थिक वर्षका लागि ल्याउन लागेको बजेट तथा नीति कार्यक्रममा करको दर र दायरा नबढाउन भन्दै नेपाली कांग्रेसले विरोध जनाएको छ ।
गत आर्थिक वर्षमा एकीकृत सम्पत्ति कर र व्यवसायी करमा गरिएको वृद्धि फिर्ता लिन कांग्रेसले प्रदर्शन नै गरेको हो । शुक्रबार नेपाली कांग्रेसले गत वर्ष बद्धि गरिएको एकीकृत सम्पत्ति लगायत कर फिर्ता गर्न र आगामी आर्थिक वर्षका लागि नयाँ कर वृद्धि नगर्न दबाव दिँदै वीरगन्जमा जुलुस निकालेको छ ।
नेपाली कांग्रेस पर्साका सभापति अजय द्विवेदीको नेतृत्वमा घण्टाघर चोकबाट सुरु भएको कांग्रेस नेता कार्यकर्ताहरुको विरोध जुलुस नगर परिक्रमा गरी वीरगन्ज महानगरपालिकासम्म पुगेको थियो ।
जुलुसले नगर प्रमुख विजय सरावगीलाई ज्ञापनपत्र समेत बुझाएको छ । ज्ञापनपत्रसँगै कांग्र्रेसले कर वृद्धिको विरोधमा नगरमा संकलन गरेको नगरबासीको हस्ताक्षर सहितको पत्र पनि बुझाएको छ ।
जेठ २५ देखि जेठ ३० सम्म महानगरका सबै ३२ वडाबाट गरी करिब ५ हजार हस्ताक्षर संकलन गरिएको र उक्त हस्ताक्षर पनि नगरप्रमुखलाई बुझाइएको कांग्रेस पर्साका सचिव किशोरी साह कानुले जानकारी दिए ।
स्थानीय तहको निर्वाचनअघि कर्मचारीको बोर्डले नै नगरबासीको क्षमता भन्दा बढी करको दर र दायरा निर्धारण गरी कर असुली गर्दैआएकोमा निर्वाचनपछि भने जनप्रतिनिधिले पनि झन् नगरबासीले थेग्नै नसक्ने गरी कर वृद्धि गरेको कांग्रेसको आरोप छ ।
गत साउनदेखि नै कर वृद्धिको विरोधमा पटक पटक सडक आन्दोलन गर्दैआएको कांग्रेसले नयाँ आर्थिक वर्षको बजेटमा महानगरपालिकाले थप कर बद्धि गर्न लागेको भन्दै विरोध गरेको जनाएको छ ।
जनताको आयको हिसाबले कर लिनुपर्नेमा महानगरपालिकाले जनताको ढाड सेक्ने हिसाबले कर बृद्धि गर्दैआएकोले विरोध गर्नु परेको कांग्रेस नेता एंव पूर्व सांसद राजेन्द्र बहादुर अमात्यले बताए ।
महानगरपालिकाका कार्यपालिका सदस्य अरविन्द गुप्ताले कार्यपालिका बैठकमा करको दर र दायर घटाउन बारम्बार आग्रह गर्दा पनि सुनुवाइ नभएकोले सडकमा उत्रिनु परेको बताए । यस्तै विरगन्जका उद्योगी व्यपारीहरुले पनि कर बृद्धि नगर्न जनप्रतिनिधिलाई सुझाव दिएक हुन् ।
प्रतिक्रिया दिनुहोस !
