काठमाडौं : महिला फुटबललाई गति दिन सक्ने खेलाडी हुन्, सावित्रा भण्डारी । उनी ब्राजिली फुटबलको प्रशंसक हुन्, त्यसैले आफैंले आफैंलाई ‘साम्बा’ भन्न पनि रुचाउँछिन् । ‘साम्बा’ भन्ने, तर खेल भने औसत ? त्यो त हुनु भएन् नै । धन्न, सावित्रा त्यस्ती छैनन् । सन् १९८० बाट नेपालमा महिला फुटबलमा जग बसेको मानिन्छ र त्यसयता नेपालले पाएका अब्बल दर्जाको एक खेलाडीमा पर्छिन्, उनी ।
सफल हुनु र चर्चामा रहनु दुई फरक परिस्थिति हो, सावित्रा भने उनी दुवैमा दरिलोसँग उपस्थित छिन् । नेपाली महिला फुटबलमा अझै धेरै हुन बाँकी छ, अझ भनौं केही भएकै छैन् । ठीक यही बेला नेपाली फुटबलले ठूलठूला सपना पनि बुनेको छ । साफ च्याम्पियनसिप मात्र जित्ने होइन, दक्षिण एसियाको घेरा तोडेर एसियाली फुटबलसम्म पहुँच बनाउने ।
यो परिस्थितिमा आस बनेर उभिएकी खेलाडी हुन्, सावित्रा । घरेलु फुटबलमा एपीएफबाट खेल्दा होस् अथवा नेपालको राष्ट्रिय टिमबाटै । खेलाडीको हूलबाट उनी ठ्याक्कै फरक देखिन्छिन्, अरू भन्दा तीव्र, चुस्त र स्तरीय । यसैमा टिकेर उनी वर्ष २०७५ मा लगातार चर्चामा पनि रहिन् । चर्चा कतिसम्म भने उनको जत्तिको लोकप्रियता अहिलेको पुरुष खेलाडीले पनि विरलै मात्र पाएका छन् होला ।
यस्तोमा उनी ‘एनएसजेएफ इन एसोसियसन विथ एक्सन स्पोर्ट्स एचडी प्रिजेन्स बजाब पल्सर स्पोर्ट्स अवार्ड पावर्ड बाई गोल्डस्टार’ को पिपुल्स च्वाइस अवार्डको मनोनयनमा नपर्ने प्रश्न नै भएन् । स्पोर्ट्स अवार्डको यो विधामा पाँच प्रत्यासी छन् र त्यसको निर्णय हुनेछ, मतका आधारमा । सामाजिक सञ्जाल फेसबुक र एसएमएसमार्फत आएको मतसँगै राष्ट्रिय खेल संघका मुख्य प्रशिक्षक र आयोजक मञ्चका सदस्यले दिएको मतले विजेताको निर्णय हुनेछ ।
वर्ष २०७५ मा सावित्राकै गतिलो योगदानका कारण नेपाली टोली भारतमा सम्पन्न हिरो गोल्डकपको फाइनलसम्म पुग्यो । त्यसै क्रममा नेपालले पहिलो पल्ट भारतलाई हरायो । विराटनगरमा भएको वुमेन्स साफ च्याम्पियनसिपमा नेपाल फेरि एकपल्ट फाइनलमा भारतसँगै पराजित भयो । तर सावित्रा सर्वाधिक गोल गर्ने खेलाडीको सूचीमा शीर्ष स्थानमै छिन् ।
एपीएफले नै वर्ष २०७५ मा लिग जित्दा उनी सर्वाधिक गोलकर्ता मात्र भइनन्, उत्कृष्ट खेलाडी पनि बनिन् । नेपालले पहिलो पल्ट ओलम्पिक छनोटको दोस्रो चरण तय गर्दा पनि सावित्राको भूमिका कम थिएन । उनलाई अवार्ड दिलाउने जिम्मा अब उनकै प्रशंसकहरूको हातमा छ ।
प्रतिक्रिया दिनुहोस !
