लन्डन : आईसीसी एकदिवसीय विश्वकप क्रिकेटअन्तर्गत मंगलबार भएको खेलमा घरेलु टोली इङ्ल्यान्ड विजयी भएको छ । मंगलबार भएको खेलमा इङ्ल्यान्डले एसियाली प्रतिद्वन्द्वी अफगानिस्तानलाई १५० रनले पराजित गर्यो ।
ओल्ड ट्राफोर्डमा इङ्ल्यान्डले दिएको ३९८ रनको विशाल लक्ष्य पछ्याएको अफगानिस्तानले निर्धारित ५० ओभरमा आठ विकेट गुमाएर २४७ रन मात्र बनाउन सकेपछि आयोजक इङ्ल्यान्डले सहज जित निकालेको हो ।
अफगानिस्तानका हस्मतुल्ला साहिदीले ७६ रनको अर्धशतकीय पाली खेले । टोलीका लागि सर्वाधिक रन बनाएका उनले १०० बलमा दुई छक्का र पाँच चौका हिर्काए । यसैगरी रमात साहले ४६, अस्गर अफगानले ४४, कप्तान गुलबद्दिन नइबले ३७, निजाबुल्ला जाडरनले १५ रन बनाए । इङ्ल्यान्डका अदिल रसिद र जोफरा आर्चरले तीन÷तीन विकेट लिए । यस्तै मार्क उडले पनि दुई विकेट हात पारे ।
यसअघि ओल्ड ट्राफोर्डमा टस जितेर पहिले ब्याटिङ गरेको इङ्ल्यान्डले ६ विकेटको क्षतिमा ३९७ रनको विशाल योगफल खडा गरेको थियो । यो जारी विश्वकपकै सर्वाधिक ठूलो योगफल हो । यसै विश्वकपमा यसअघि इङ्ल्यान्डविरुद्ध नै पाकिस्तानले ३४८ रनको योगफल खडा गरेको थियो ।
इङ्ल्यान्डको विशाल योगफलमा कप्तान इयोन मोर्गनले शतक र जोनी बेयरस्ट र जोए रुटले अर्धशतकीय पाली खेले । आक्रामक ब्याटिङ गरेका मोर्गनले १४८ रन बनाए । उनले ७१ बलमा १७ छक्का र चार चौका हिर्काए । उनले ५७ बलमा शतक पूरा गरेका थिए । एकदिवसीय क्रिकेटमा उनको १३औं शतक हो । उनले एकदिवसीय क्रिकेटको एउटै पालीमा सर्वाधिक छक्का हिर्काउने कीर्तिमान पनि आफ्नो नाममा लेखाए ।
उनले भारतका रोहित शर्मा, दक्षिण अफ्रिकाका एबी डिभिलियर्स र वेस्ट इन्डिजका क्रिस गेलको नाममा रहेको कीर्तिमान आफ्नो नाममा लेखाएका हुन् । यी तीनै खेलाडीको नाममा १६÷१६ छक्काको कीर्तिमान थियो ।
यसैगरी बेयरस्टले ९० र रुटले ८८ रनको पाली खेले । बेयरस्टले ९९ बलमा तीन छक्का र नौ चौका हिर्काए । यस्तै रुटले ८२ बलमा एक छक्का र पाँच चौका प्रहार गरे । यसैगरी मोइन अलीले पनि आक्रामक ब्याटिङ गर्दै नौ बलमा ३१ रन बनाए । उनले पनि चार छक्का र एक चौका हिर्काए । अफगानिस्तानका दौलत जाडरन र कप्तान गुलबद्दिन नइबले तीन÷तीन विकेट लिए ।
जारी विश्वकपमा इङ्ल्यान्डले दक्षिण अफ्रिका, बंगलादेश र वेस्ट इन्डिजलाई पराजित गरेको थियो । इङ्ल्यान्डले दक्षिण अफ्रिकालाई १०४ रन, बंगलादेशलाई १०६ रन र वेस्ट इन्डिजलाई आठ विकेटले हराएको थियो । पाकिस्तानसँग भने इङ्ल्यान्ड १४ रनले पराजित भएको थियो । यसैगरी अफगानिस्तान भने अस्ट्रेलिया, श्रीलंका, न्युजिल्यान्ड र दक्षिण अफ्रिकासँग पराजित भएको थियो ।
प्रतिक्रिया दिनुहोस !
