एउटै पालीमा सर्वाधिक रनको कीर्तिमान
विश्वकप क्रिकेटको इतिहासमा एकै पालीमा सर्वाधिक रन बनाउने टोलीको कीर्तिमान अस्ट्रेलियाको नाममा छ । अस्ट्रेलियाले सो कीर्तिमान सन् २०१५ को विश्वकपमा बनाएको थियो । उक्त विश्वकपको पर्थमा खेलिएको अफगानिस्तानविरुद्घको खेलमा अस्ट्रेलियाले निर्धारित ५० ओभरमा ६ विकेट गुमाएर चार सय १७ रन बनाएको थियो । अस्ट्रेलियाका लागि ओपनर ब्याट्सम्यान डेभिड वार्नरले एक सय ७८, स्टिभन स्मिथले ९५ र ग्लेन म्याक्सवेलले ८८ रन बनाएका थिए ।
जवाफी ब्याटिङमा ओर्लिएको अफगानिस्तान ३७.३ ओभरमा एक सय ४२ रनमा अलआउट भएपछि अस्ट्रेलियाले दुई सय ७५ रनले खेल जितेको थियो । विश्वकपमा अफगानिस्तानको यो पहिलो सहभागिता थियो । त्यसअघि विश्वकपमा सबैभन्दा बढी रन बनाउने कीर्तिमान भारतको नाममा थियो ।
भारतले सन् २००७ को विश्वकपमा बर्मुडाविरुद्घको खेलमा निर्धारित ५० ओभरमा पाँच विकेट गुमाएर चार सय १३ रन बनाएको थियो । हालसम्म विश्वकपको एउटै पालीमा चारपटक चार सयभन्दा बढी रन बनेको छ । दक्षिण अफ्रिकाले सन् २०१५ को विश्वकपमा आयरल्यान्डविरुद्घ चार विकेट गुमाएर चार सय ११ र सोही विश्वकपमा वेस्ट इन्डिजविरुद्घ पाँच विकेट गुमाएर चार सय आठ रन बनाएको थियो ।