सुन तस्करी मुद्दा : तीन न्यायाधीशसँग ७ दिनभित्र स्पष्टिकरण मागियो

काठमाडौं : सुन तस्करीसम्बन्धी मुद्दा मुछिएका उच्च अदालत विराटनगरका तीनजना न्यायाधीशलाई सात दिनभित्र स्पष्टिकरण पेश गर्न भनिएको छ ।

प्रधानन्यायाधीश चोलेन्द्रसमशेर राणाको अध्यक्षतामा बसेको परिषद वैठकको निर्णय अनुसार उच्च अदालत विराटनगरका न्यायाधीशहरु थीरबहादुर कार्की, साधुराम सापकोटा र उमेश सिंहलाई स्पष्टिकरण पेश गर्न भनिएको हो ।

परिषदले उच्च अदालत विराटनगरका मुख्य न्यायाधीश डा. कुलरत्न भुर्तेल, न्यायाधीशहरु सारङ्गा सुवेदी र जनक पाण्डेलाई आइन्दा अदालत र न्यायाधीशको मर्यादा राख्न थप सावधानी अपनाउन सचेत गरिएको छ । 

विवादमा तानिएका न्यायाधीशद्वय नागेन्द्रलाल कर्ण र उमेशराज पौडेलको अवकास भएका कारण उजुरी तामेलीमा राख्ने निर्णयसमेत भएको छ । न्याय परिषदका प्रवक्ता मानबहादुर कार्कीका अनुसार परिषदबाट सर्वसम्मत रुपमा उक्त निर्णय भएको हो ।

सुन तस्करी प्रकरण साढे ३३ केजी सुन तस्करीका अभियुक्त र सनम शाक्य हत्या प्रकरणसम्बन्धी मुद्दामा न्यायिक विचलनको आशंकामा भएको छानविन प्रतिवेदनमाथि छलफलका लागि मंगलबार र बुधबार न्याय परिषद वैठक बसेको थियो ।
 
‘तीनजनाको हकमा सफाइ र तीनजनालाई सफाइ पेश गर्न निर्णय भएको छ । भोलि वा पर्सीमै पत्र जान्छ,’ सहसचिव एवं प्रवक्ता कार्कीले अन्नपूर्णसँग भने । यी न्यायाधीश उपर छानविनका लागि न्यायापरिषद्ले गत चैत २५ गते सर्वोच्चका न्यायाधीश केदारप्रसाद चालिसेको अध्यक्षतामा न्यायाधीश मीरा खड्का र विश्वम्भरप्रसाद श्रेष्ठ सदस्य रहेको अधिकारसम्पन्न समिति गठन गरेको थियो । समितिले अघिल्लो साता प्रधानन्यायाधीश समक्ष छानविन प्रतिवेदन बुझाएको थियो ।