काठमाडौं : प्रेस काउन्सिलले आयोजना गरेको ‘चलचित्र पत्रकारिताको अवस्था र पत्रकार आचारसंहिता’ विषयक गोष्ठीमा प्रनेश गौतमको प्रसंग चर्चामा रह्यो।
उता चलचित्र विकास बोर्डका अध्यक्ष केशव भट्टराईको अभिव्यक्ति भने फरक थियो। उनले भने, ‘५ हजार नपाएको रिस प्रनेशले यूट्युवमा पोखेका हुन्। उनको पक्षमा वकालत गरिरहनु जरुरी छैन।’ अर्को प्रसंगमा उनले भने,‘चलचित्र पत्रकारिता मर्यादित नहुँदासम्म समग्र चलचित्र उद्योग व्यवस्थित हुन सक्तैन। त्यसैले, आफै सही गलत छुट्याई सेल्फसेन्सरसिपमा पत्रकारिता गरे उपर्युक्त होला।’
चलचित्र पत्रकारितामा तीन दशक बढी बिताएका विजयरत्न तुलाधरको विचारमा फिल्मको समीक्षा कसरी गर्नेबारे गोष्ठी अत्यावश्यक छ। ‘फिल्मको समीक्षाको कि पुरै सकारात्मक, कि पुरै नकारात्मक आउने गरेको छ। सन्तुलित ढंगले फिल्मको समीक्षा हुन सकेको छैन’, उनले भने।
रंग पत्रकार कृष्ण भट्टराईले कलाकार, निर्माताविरुद्धमा भएकै जानकारी पस्किदा अनावश्यक धम्की खेप्नु परेकोमा दुःख पाेखे । उनले हलिउड, बलिउडमा गसिपले उचित स्थान पाएको तर नेपाली चलचित्र पत्रकारितामा त्यो पच्न नसकेको बताए। अर्का रंगपत्रकार डब्बु क्षेत्रीले अनलाइन पत्रकारितामा ब्रेकिङ न्यूजको लोभले चलचित्रमा पत्रकारिता पनि असर पारेको विचार राखे।
ठूलो पर्दा डटकमका जीवन पराजुलीले अनलाइन पत्रकारितालाई कस्ने प्रेस काउन्सिलले त्यही अनलाइनमा अपलोड गरिएका यूट्युबबारे केही नबोलेको आरोप लगाए। अनलाइन दर्ता गर्नुपर्छ तर दर्ता गर्न नपर्ने यूट्युबेले चलचित्र पत्रकारिता मात्रै होइन, समग्र पत्रकारितालाई वदनाम गरेको उनको भनाइ थियो।
चलचित्र विषयमा केन्द्रित रही अनलाइन पत्रकारिता गरिहेकाको तर्क थियो, वन म्यान अनलाइन चलाइरहेकालाई ३ जना कर्मचारी राखेर सामाजिक सुरक्षा कर तिर्नुपर्ने नियम नहटाएसम्म धेरै अनलाइन अबैध रुपले चल्ने छन् या बन्द हुनेछन्। काउन्सिलले सामाजिक सुरक्षा कर तिर्नुपर्ने नियम हटाउनुपर्छ। कार्यक्रम प्रेस काउन्सिलका कार्यबाहक अध्यक्ष किशोर श्रेष्ठको अध्यक्षतामा भएको थियो।
प्रतिक्रिया दिनुहोस !
