अपराजित र जितविहीन टोलीको भिडन्त
रोज बल : विश्वकप क्रिकेटमा शनिबार दुई खेल हुँदै छन् । पहिलो खेलमा बलियो भारतले तुलनात्मक रूपमा कमजोर प्रतिद्वन्द्वी अफगानिस्तानको सामना गर्नेछ । उक्त खेल साउथह्याम्पटनको रोज बल रंगशालामा नेपाली समयअनुसार दिउँसो ३ :१५ बजे सुरु हुनेछ । दोस्रो खेल दुई पुराना प्रतिद्वन्द्वी न्युजिल्यान्ड र वेस्ट इन्डिजबीच खेलिनेछ । उक्त खेल म्यानचेस्टरस्थित ओल्ड ट्राफोर्डमा साँझ ६ :१५ बजे सुरु हुनेछ ।
विश्वकपमा भारत दुई पटकको उपाधि विजेता टोली हो । पहिलो संस्करणदेखि नै विश्वकपमा सहभागिता जनाउँदै आएको भारतले सन् १९८३ र सन् २०११ मा उपाधि चुमेको थियो । अफगानिस्तानको भने विश्वकपमा यो केवल दोस्रो सहभागिता हो । अफगानिस्तानले यसअघि सन् २०१५ को विश्वकप मात्र खेलेको थियो ।
जारी विश्वकपमा हालसम्म अपराजित दुई टोलीमध्ये भारत पनि एक हो । आफूले खेलेका चारमध्ये तीनवटा खेलमा भारत विजयी भएको छ । भारतको एक खेल भने वर्षाका कारण रद्द भएको थियो । यसको ठीक विपरीत अफगानिस्तानले भने हालसम्म एक खेल पनि जित्न सकेको छैन । आफूले खेलेका पाँचवटै खेलमा अफगानिस्तानले हार भोगेको छ ।
अघिल्ला खेलमा भारतले दक्षिण अफ्रिका, बलियो अस्ट्रेलिया र चिरप्रतिद्वन्द्वी पाकिस्तानलाई हराएको थियो । भारत र न्युजिल्यान्डबीचको खेल भने वर्षाका कारण रद्द भएको थियो । पाँच खेल खेलेको न्युजिल्यान्ड पनि हालसम्म अपराजित छ । अफगानिस्तान भने अस्ट्रेलिया, श्रीलंका, न्युजिल्यान्ड, दक्षिण अफ्रिका र इङ्ल्यान्डसँग पराजित भइसकेको छ ।
अफगानिस्तान र भारत विश्वकपमा पहिलो पटक भिड्न लागेका हुन् । एकदिवसीय अन्तर्राष्ट्रिय प्रतियोगितामा भने यसअघि यी दुई टोलीबीच दुई पटक आपसमा भिडन्त भएको छ । सन् २०१४ को एसिया कपमा भारतले अफगानिस्तानलाई आठ विकेटले पराजित गरेको थियो । सन् २०१८ को एसिया कपमा भने यी दुई टोलीबीचको खेल बराबरीमा सकिएको थियो । त्यति बेला दुवै टोलीले समान दुई सय ५२ रन बनाएका थिए।
जारी विश्वकपमा भारतलाई उपाधिको प्रबल दाबेदारका रूपमा हेरिएको छ । यति बेला भारतको ब्याटिङ र बलिङ दुवै लयमा छ । भारतीय ब्याट्सम्यान रोहित शर्माले अघिल्ला तीन खेलमा दुई शतक र एउटा अर्धशतक प्रहार गरिसकेका छन् । उनले दक्षिण अफ्रिकाविरुद्ध अविजित १२२ र पाकिस्तानविरुद्ध १४० रन बनाएका थिए । अस्ट्रेलियाविरुद्धको खेलमा पनि उनले ५७ रन बनाएका थिए ।
यसैगरी भारतीय कप्तान विराट कोहलीले पनि दुई खेलमा अर्धशतक बनाएका छन् । उनले अस्ट्रेलियाविरुद्ध ८२ र पाकिस्तानविरुद्ध ७७ रन बनाएका थिए । कोहली अन्तर्राष्ट्रिय क्रिकेटमा २० हजार रन पूरा गर्नबाट केवल १०४ रनले पछाडि छन् । यसअघि भारतका सचिन तेन्दुल्कर र राहुल द्रभिडले मात्र अन्तर्राष्ट्रिय क्रिकेटमा २० हजारभन्दा बढी रन बनाउन सकेका छन् । पाकिस्तानविरुद्ध केएल राहुलले पनि ५७ रन बनाएका थिए । अस्ट्रेलियाविरुद्धको खेलमा एक सय १७ रन बनाउने शिखर धवन औंलाको चोटका कारण विश्वकपबाट बाहिरिँदा भने भारतलाई ठुलै धक्का लागेको छ ।
भारतसँग उत्कृष्ट बलरहरूको पनि कमी छैन । हालसम्म युजभेन्द्र चाहलले ६, जसप्रीत बुमराहले पाँच र भुवनेश्वर कुमारले पाँच विकेट लिइसकेका छन् । चाहलले दक्षिण अफ्रिकाविरुद्ध चार र अस्ट्रेलियाविरुद्ध दुई विकेट लिएका थिए । बुमराहले अस्ट्रेलियाको तीन र दक्षिण अफ्रिकाको दुई विकेट हात पारेका थिए । यसका अतिरिक्त कुलदीप यादव, विजय शंकर र हार्दिक पाण्डेया पनि लयमा छन् ।
अर्कोतिर अफगानिस्तानले हालसम्म गतिलो ब्याटिङ गर्न सकिरहेको छैन । अफगानिस्तानले इङ्ल्यान्ड र अस्ट्रेलियाविरुद्ध मुस्किलले दुई सय रन कटाएको थियो । बाँकी तीन खेलमा त अफगानिस्तान दुई सयभन्दा कम योगफलमै समेटिएको थियो । यो विश्वकपमा अफगानिस्तानको बलिङ पनि खासै जम्न सकेको छैन ।
शनिबार साँझको खेलमा अर्को अपराजित टोली न्युजिल्यान्डले वेस्ट इन्डिजको सामना गर्दै छ । पाँच खेल खेलेको वेस्ट इन्डिजले भने एक खेल मात्र जित्न सकेको छ । तीन खेलमा पराजित भएको वेस्ट इन्डिजको एउटा खेल भने वर्षाका कारण रद्द भएको थियो । वेस्ट इन्डिज पहिलो र दोस्रो विश्वकपको उपाधि विजेता हो भने न्युजिल्यान्ड साविक उपविजेता टोली हो ।
आजको खेल
अफगानिस्तानविरुद्ध भारत
रोज बल (दिउँसो ३ :१५ बजे)
० न्युजिल्यान्डविरुद्ध वेस्ट इन्डिज
ओल्ड ट्राफोर्ड (साँझ ६ :१५ बजे)
एकदिवसीयमा दुई टोली (भारत र अफगानिस्तान)
कुल : २ खेल
भारत विजयी : १ खेल
अफगानिस्तान विजयी : ० खेल
बराबरी : १ खेल
एकदिवसीयमा दुई टोली (न्युजिल्यान्ड र वेस्ट इन्डिज)
कुल : ६४ खेल
न्युजिल्यान्ड विजयी : २७ खेल
वेस्ट इन्डिज विजयी : ३० खेल
अनिर्णित : ७ खेल
विश्वकपमा दुई टोली (न्युजिल्यान्ड र वेस्ट इन्डिज)
कुल : ७ खेल
न्युजिल्यान्ड विजयी : ४ खेल
वेस्ट इन्डिज विजयी : ३ खेल