रियो दी जेनेरियो : ब्राजिलमा जारी कोपा अमेरिका फुटबल प्रतियोगितामा आयोजक ब्राजिलले फराकिलो जित निकालेको छ । आइतबार बिहान भएको खेलमा ब्राजिलले पेरुमाथि ५–० को एकपक्षीय जित हात पारेको हो ।
यसअघिको खेलमा भेनेजुएलासँग बराबरीमा रोकिएको ब्राजिल बलियो प्रतिद्वन्दी मानिएको पेरुविरुद्ध चम्किएको हो । ब्राजिलले ३ गोल पहिलो हाफमा र २ गोल दोस्रो हाफमा गरेको थियो ।
ब्राजिलका लागि पहिलो हाफमा कस्मिरो(१२औं मिनेट), रोवेर्टो फर्मिनो(१९औं मिनेट), इभर्टन सोरेज(३२औं मिनेट)ले गोल गरेका हुन्। थप २ गोल दोस्रो हाफमा डानी अलभेज(५२औं मिनेट) र विलियन(९०औं मिनेट) ले गरेका हुन्) । अधिकांश समय बल आफ्नो नियन्त्रणमा लिएर ब्राजिलले खेल एक पक्षीय बनाएको थियो ।
जितसँगै ७ अंक बनाएको ब्राजिलसमूह ए को विजेता हुँदै क्वाटर फाइनलमा प्रवेश गरेको छ । सोही समूहमा बोलिभियालाई पराजित गरी भेजेजुएलाले पनि नकआउट चरणमा स्थान बनाएको छ । भेनेजुएलाले आइतबार बिहानै भएको खेलमा बोलिभियालाई ३–१ ले हराउँदै ५ अंकका साथ उपविजेता हुँदै क्वाटर फाइनलको स्थान सुरक्षति गरेको हो । अंकविहीन बोलिभिया प्रतियोगिताबाट बाहिरिएको छ । ४ अंक रहेको पेरुको भने उत्कृष्ट तेस्रो बन्दै क्वाटर फाइनलमा पुग्ने सम्भावना जिवितै छ ।
प्रतिक्रिया दिनुहोस !
