एजेन्सी :लन्डनविश्वकप क्रिकेटमा आइतबार पाकिस्तान र दक्षिण अफ्रिकाबीच प्रतिस्पर्धा हुनेछ । लर्डस मैदानमा नेपाली समयअनुसार दिउँसो ३ :१५ बजे सुरु हुने यी दुई टोलीको खेल रोमाञ्चक हुने अनुमान गरिएको छ ।
कहिले एक सय पाँच रनमै अलआउट हुने र कहिले इङ्ल्यान्डजस्तो बलियो टोलीलाई हराउने पाकिस्तानको शैली अपत्यारिलो छ । पहिलो खेलमा एक सय पाँच रनमै अलआउट भएको पाकिस्तान वेस्ट इन्डिजसँग सात विकेटले पराजित भएको थियो । दोस्रो खेलमा तीन सय ४८ रन बनाएको पाकिस्तानले घरेलु टोली इङ्ल्यान्डलाई १४ रनले हराएको थियो । पाकिस्तान र श्रीलंकाबीचको खेल भने वर्षाका कारण रद्द भएको थियो ।
चौथो खेलमा पाकिस्तान अस्ट्रेलियासँग ४१ रनले पराजित भएको थियो । पाकिस्तान आफ्नो पाँचौं खेलमा चिरपरिचित प्रतिद्वन्द्वी भारतसँग डकवर्थ एन्ड लेविस नियमका आधारमा ८९ रनले पराजित भएको थियो । पाकिस्तान विश्वकपको उपाधि चुमिसकेको टोली हो । पाकिस्तानले सन् १९९२ मा एक पटक मात्र विश्वकपको उपाधि जितेको थियो । पाकिस्तान आइतबार छैटौं खेल खेल्दै छ । पाकिस्तानको बलियो पक्ष भनेको तीव्र गतिका बलर हो । विश्वकपको सेमिफाइनल यात्रा जीवित राख्न पाकिस्तानलाई आइतबार दक्षिण अफ्रिकालाई हराउनुपर्ने बाध्यता छ।
यसैगरी दक्षिण अफ्रिका सन् १९९२ पछि मात्र विश्वकपमा सहभागी भएको हो । दक्षिण अफ्रिका भने विश्वकपमा सेमिफाइनलभन्दा अगाडि बढ्न सकेको छैन । जारी विश्वकपमा पनि दक्षिण अफ्रिका त्यति जम्न सकेको छैन । दक्षिण अफ्रिका आइतबार सातौं खेल खेल्दै छ । ६ खेल खेलिसकेको दक्षिण अफ्रिकाले एक खेल जितेको छ । चार खेलमा पराजित भएको दक्षिण अफ्रिकाले वर्षाका कारण एक खेल अनिर्णित रूपमा जित बुझाएको थियो । ६ खेलबाट तीन अंक बनाएको दक्षिण अफ्रिकालाई अगाडि बढ्न अबको खेल जित्नैपर्ने अवस्था छ ।
आफ्नो पहिलो खेलमा दक्षिण अफ्रिका घरेलु टोली इङ्ल्यान्डसँग एक सय चार रनले पराजित भएको थियो । दक्षिण अफ्रिका दोस्रो खेलमा बंगलादेशसँग २१ रन र अर्को खेलमा भारतसँग ६ विकेटले पराजित भएको थियो । वेस्ट इन्डिजविरुद्धको खेल वर्षाका कारण अनिर्णित बनेको थियो । अर्को खेलमा दक्षिण अफ्रिकाले अफगानिस्तानलाई डकवर्थ एन्ड लेविस नियमका आधारमा नौ विकेटले हराएको थियो । पछिल्लो खेलमा दक्षिण अफ्रिका न्युजिल्यान्डसँग चार विकेटले पराजित भएको थियो । पाकिस्तानलाई हराउन दक्षिण अफ्रिकाका लागि क्विन्टन डी कक, फाफ डु प्लेसिस, कागिसो राबडाजस्ता खेलाडीको प्रदर्शन महत्वपूर्ण बन्न सक्नेछ ।
पाकिस्तान र दक्षिण अफ्रिकाबीच यसअघि भएको भिडन्तमा दक्षिण अफ्रिका बलियो देखिएको छ । एकदिवसीयमा अन्तर्राष्ट्रिय क्रिकेट प्रतियोगितामा यी दुई टोली ७८ पटक भिडेका छन् । दक्षिण अफ्रिकाले ५० खेल जितेको छ । पाकिस्तानले २७ खेल जितेको छ । एक खेल अनिर्णित भएको छ । विश्वकप क्रिकेटमा यी दुई टोलीले चार पटक खेलेका छन् । तीन खेल दक्षिण अफ्रिकाले जितेको छ । पाकिस्तानले एक खेल मात्र जितेको छ । यस विश्वकपमा दुवै टोलीको स्तर उस्तै देखिएको छ । तालिकामा समेत तीन तीन अंक रहेकाले यी दुई टोलीको खेल प्रतिस्पर्धात्मक हुने निश्चित छ ।
आजको खेल
पाकिस्तानविरुद्ध दक्षिण अफ्रिका
लर्डस (दिउँसो ३ :१५ बजे)
विश्वकपमा दुई टोली
कुल : ४ खेल
दक्षिण अफ्रिका विजयी :३ खेल
पाकिस्तान विजयी : १ खेल
एकदिवसीयमा दुई टोली
कुल : ७८खेल
दक्षिण अफ्रिका विजयी :५० खेल
पाकिस्तान विजयी : २७ खेल
अनिर्णित : १ खेल
प्रतिक्रिया दिनुहोस !
