बैतडी : बैतडीमा मंगलबार एउटा मालवहाक ट्रक र मोटरसाइकल ठोक्किँदा तीनजना घाइते भएका छन् ।
घाइतेमध्ये एकजनाको अवस्था गम्भीर रहेको बताइएको छ । घाइते हुनेमा मोटरसाइकल चालक बैतडीको दोगडाकेदार–३ श्रीकोटका १८ वर्षीया मानमती भट्ट, सोही ठाउँका १२ वर्षीया ज्योती जोशी र १५ वर्षीया मिना भट्ट छन् ।
घाइतेमध्ये मानमतीको अवस्था गम्भीर रहेको बैतडीका प्रहरी प्रवक्ता प्रहरी निरीक्षक दीपक पातलीले जानकारी दिए । मानमतीको टाउको निधार र खुट्टामा चोट रहेको उनले बताएका छन् । घाइते तीनै जनाको जिल्ला अस्पताल बैतडीमा उपचार भइरहेको छ ।
धनगढीवाट दार्चुला जाँदै गरेको ना ६ ख १८३६ नम्बरको ट्रक (टेलर) र खोचलेकबाट सिल्लेगडातर्फ जाँदै गरेको म २ प ११७५ नम्बरको मोटरसाइकल महाकाली राजमार्ग अन्तर्गत बैतडीको दोगडाकेदार गाउँपालिका ३ सिल्लेगडा बजार नजिकै दानीमोडमा मंगलबार दिउँसो ३ बजे दुर्घटनामा परेका हुन् ।
साँधुरो बाटो र घुम्ती रहेकाले दुर्घटना भएको हुनसक्ने अनुमान प्रहरीकोे छ । ट्रक र ट्रक चालकलाई प्रहरीले नियन्त्रणमा लिएको छ । घटनाको थप अनुसन्धान भइरहेको जिल्ला प्रहरी कार्यालय बैतडीले जनाएको छ ।
प्रतिक्रिया दिनुहोस !
