अपराजित रहने दाउमा किविज
बर्मिङ्घम : जारी विश्वकपको बुधबार हुने खेलमा बलियो न्युजिल्यान्डले दक्षिण एसियाली टोली पाकिस्तानसँग प्रतिस्पर्धा गर्दैछ । उक्त खेल बर्मिङ्घमस्थित एजबास्टनमा नेपाली समयअनुसार दिउँसो ३ः१५ बजे सुरु हुनेछ । यी दुवै टोली पहिलो संस्करणदेखि नै विश्वकपमा सहभागी हुँदै आएका छन् । पाकिस्तान सन् १९९२ को उपाधि विजेता टोली हो भने न्युजिल्यान्डले हालसम्म विश्वकपको उपाधि जित्न सकेको छैन ।
यो विश्वकपमा भने पाकिस्तानको तुलनामा न्युजिल्यान्ड निकै बलियो देखिएको छ । यी दुवै टोलीले यो विश्वकपमा हालसम्म ६÷६ खेल खेलिसकेका छन् । न्युजिल्यान्डले एक खेल पनि हारेको छैन भने पाकिस्तानले दुई खेलमात्र जितेको छ । पाँच खेलमा जित हात पारेको न्युजिल्यान्डको एक खेल भने वर्षाका कारण रद्द भएको थियो । तीन खेलमा पराजित भएको पाकिस्तानको पनि एक खेल वर्षाका कारण रद्द भएको थियो ।
जारी विश्वकपमा न्युजिल्यान्डको टोली निकै सन्तुलित छ । न्युजिल्यान्डको ब्याटिङ र बलिङ दुवै उत्कृष्ट छ । अर्कोतिर पाकिस्तानको प्रदर्शनमा भने निकै उतारचढाव देखिन्छ । वेस्ट इन्डिजविरुद्ध एक सय पाँच रनमै अलआउट भएको पाकिस्तानले बलियो इङ्ल्यान्डविरुद्ध तीन सय ४८ रन बनाएर १४ रनको जित हात पारेको थियो । अन्य टोलीविरुद्धको खेलमा पनि पाकिस्तानको प्रदर्शन एकनासको देखिएको छैन ।
अन्तर्राष्ट्रिय क्रिकेटमा यी दुवै टोली एकअर्काका निकै पुराना प्रतिद्वन्द्वी हुन् । यी दुई टोली एकदिवसीय क्रिकेटमा सन् १९७३ देखि आपसमा भिड्दै आएका छन् । हालसम्म यी दुई टोलीबीच खेलिएको एकदिवसीय प्रतियोगिताको नतिजालाई हेर्दा न्युजिल्यान्डभन्दा पाकिस्तान केही बलियो देखिन्छ । पाकिस्तान र न्युजिल्यान्डबीच हालसम्म एक सय ६ वटा एकदिवसीय खेल भएको छ । ५४ खेलमा पाकिस्तान विजयी भएको । न्युजिल्यान्डले भने ४८ खेल जितेको छ । एक खेल बराबरीमा सकिएको छ भने तीन खेल अनिर्णित रूपमा टुंगिएको छ ।
यी दुई टोलीबीच हालसम्म विश्वकपमा खेलिएका खेलको नतिजाले पनि पाकिस्तानलाई नै बलियो देखाउँछ । विश्वकपमा यी दुई टोली आठ पटक आपसमा भिडेका छन् । पाकिस्तान ६ खेलमा विजयी भएको छ भने न्युजिल्यान्डले दुई खेलमात्र जित्न सकेको छ । सन् १९८३ को विश्वकपमा दुई खेल खेलिएकोमा एक खेल पाकिस्तान र एक खेल न्युजिल्यान्डले जितेका थिए ।
यसैगरी सन् १९९२ को विश्वकपमा पनि यी दुई टोलीबीच दुई खेल खेलिएको थियो । ती दुबै खेलमा पाकिस्तान विजयी बनेको थियो । सन् १९९६ को विश्वकपमा पाकिस्तान विजयी भएको थियो भने सन् १९९९ मा खेलिएको दुवै खेलमा पनि पाकिस्तानले नै जित हात पारेको थियो । सन् २०११ विश्वकपमा भने न्युजिल्यान्डले पाकिस्तानलाई हराएको थियो । तर, क्रिकेटमा तथ्यांकले भन्दा पनि वर्तमान समयमा टोलीको प्रदर्शनले ठूलो अर्थ राख्छ ।
समग्रमा भने पाकिस्तानले सन् १९७५ देखि हालसम्म विश्वकपमा कुल ७६ खेल खेलेको छ । ४२ खेलमा विजयी भएको पाकिस्तान ३२ खेलमा पराजित भएको छ । दुई खेल अनिर्णित रूपमा सकिएको छ । यसैगरी न्युजिल्यान्डले विश्वकपमा हालसम्म ८४ खेल खेलेको छ । ५३ खेल जितेको न्युजिल्यान्ड ३० खेलमा पराजित भएको छ । एक खेल भने अनिर्णित रूपमा सकिएको छ ।
आजको खेल
न्युजिल्यान्डविरुद्ध पाकिस्तान
एजबास्टन (दिउँसो ३ः१५ बजे)
एकदिवसीयमा दुई टोली
कुल : १०६ खेल
पाकिस्तान विजयी : ५४ खेल
न्युजिल्यान्ड विजयी : ४८ खेल
बराबरी : १ खेल
अनिर्णित : ३ खेल
विश्वकपमा दुई टोली
कुल : ८ खेल
पाकिस्तान विजयी : ६ खेल
न्युजिल्यान्ड विजयी : २ खेल