प्रेमिकाले बिहे गर्न नमानेपछि ६ वर्षीया छोरीको अपहरण !
असार ११, २०७६ बुधबार १५:५०:०
भैरहवा : भैरहवामा हालै एक अनाैठाे र डरलाग्दाे अपहरण घटना सार्वजनिक भएकाे छ । जहाँ ६ वर्षीया बालिका आफ्नी आमाका प्रेमीबाटै अपहरणमा परेकी छन् ।
छोरीको अपहरण भएको भन्दै एक दम्पति सोमबार राति प्रहरी चौकी महुवारीमा पुगे । चौकीले इलाका प्रहरी कार्यालय बुटवलमा तत्काल खबर गर्यो । प्रहरीले खबर पाएलगत्तै अपहरणमा परेकी तिलोत्तमा नपा १२ की ६ वर्षीया बालिकाको खोजी सुरु गर्यो ।
मंगलबार प्रहरीले अपहरित बालिकाका बुवा टेकबहादुर थापा र आमा मन्जु थापालाई कार्यालयमा बोलायो । उनीहरु बन्द रहेको कारण आउन नसक्ने भन्दै बुधबार आउने बताए ।
तर, घटनाको विफ्रङ लिइरहेका रुपन्देहीका एसपी हृदय थापाले प्रहरीको टोलीलाई उनीहरुको घरमै पठाए । यता एसपी थापाले सादा पोसाकमा प्रहरीको विभिन्न समूह परिचालन गरे । राजमार्गमा नाकाबन्दी गरेर चेकजाँच सुरु भयो । शंकास्पद ठाउँहरुमा छापा हानियो । प्रहरीले घटनाबारे बुझ्दै जाँदा छोरी अपहरण गर्न एक व्यक्तिले चेतावानी दिएका थिए ।
यसरी भएको थियो अपहरण
घटना विवरण अनुसार बालिकाका वुवा र आमा घर नजिकै निर्माण भइरहेको पुलमा मजदुरी गर्थे । त्यहाँ ९ महिनादेखि काम गराउँदै आएका पेटी ठेकेदार पर्सा जिल्ला बिरगन्ज महानगरपालिका २७ का ३८ वर्षीय जयराम दास थिए ।
प्रहरीका अनुसार घरनजिककै मजदुरी गर्दा ठेकेदार र बालिकाकी आमा मन्जु थापाको निकटतम सम्बन्ध बस्यो । कयौँ दिनमासम्म सँगै बाहिर घुमघाम पनि गर्न जाने गरेका थिए । दासको मनमा एकहोरो प्रेम पलाउँदै गयो । निकटतम सम्बन्धलाई लिएर दासले एक दिन मन्जुलाई विवाहको प्रस्ताव गरे । २३ वर्षीया मन्जुले प्रस्तावलाई अस्विकार गरिन् । प्रस्ताव अस्विकार गरेपछि दासले छोरी अपहरण गर्ने चेतावनी दिए ।
छोरी अपहरणपछि भने मन्जुले दाससँग भएको घटनाबारे प्रहरीलाई सविस्तार बताइन् । प्रहरीको शंकाको सुई पनि दास तिर घुम्यो । प्रहरीले मन्जुलाई दासलाई फोन सम्पर्क गर्न लगायो । उताबाट दासले झुठो बोल्दै नवलपरासीको चोरमारा रहेको जवाफ दिए । तर, उनको मोबाइल लोकेसन बुटवलमा देखायो ।
रुपन्देहीका एसपी थापाका अनुसार प्रहरीले दासमाथि खोजी तिब्र बनायो । प्रहरीले बुटवल क्षेत्रलाई आधार मानेर बालिकालाई होटलमा राखेको थाहा पाएपछि छापा मार्न सुरु गर्यो ।
यता मन्जु प्रहरी नियन्त्रणमै थिइन् । जसले दासलाई फोन सम्पर्क गरेकी थिइन् । निरन्तर फोन सम्पर्कपछि बालिकालाई होटलको कोठामा बन्धक बनाएर राखिएको हुनसक्ने भन्दै प्रहरीले होटलहरुमा खोजी जारी राखेको हो ।
फोन सम्पर्कको बेला पनि दासले मन्जुलाई आफुसँग हिँड्न दवाव दिइरहेका थिए । त्यसपछि प्रहरीले मन्जुलाई आफू विवाह गर्न तयार रहेको र बुटवलको सब्जीमण्डी क्षेत्रमा लिन आउन लगायो । यसरी दास अपहरण काण्डमा पक्राउ परेका हुन् । पक्राउ परेपपछि उनले बालिकालाई होटल बुटवल प्लाजा एण्ड रेष्टुरेण्टको कोठा नम्बर १०३ बन्धक बनाएर राखेको स्विकार गरेको प्रहरीले बताएको छ ।
प्रहरीले बालिकाको उद्दार गरेर अहिले परिवारको जिम्मा लगाइसकेको छ । । बालिका र दासको चिनजान रहेकोले उनले बालिकालाई फकाएर घरबाट मोटरसाइकलमा लगेका थिए । पक्राउ परेका दास उपर शरीर बन्धक तथा अपहरण मुद्दा दायर गरी थप अनुसन्धान अगाडी बढाएको जिल्ला प्रहरी कार्यालय रुपन्देहीले जनाएको छ ।
प्रतिक्रिया दिनुहोस !
